(sursilvan) Jeu hai astgau passendar ils davos dis a Roma cun ina gruppa da students da teologia, nua che nus essan pelegrinai sils fastitgs da s. Pieder e s. Paul. Dus carstgauns che savessen buca esser pli differents in da l’auter. In fuva pescadur sper il Lag da Genesaret e l’auter in scienziau da Tarsus. E tuttina segnan omisdus sco fundaturs da nossa Baselgia cristiana.
Tier omisdus, tier Sogn Pieder sco era tier sogn Paul, anflein nus munglaments en la cardientscha. Els ein buca stai perfetgs. Els han denton giu la curascha da suandar il clom da Diu e da midar diltuttafatg lur veta.
Sco emprem haiel jeu visitau la fossa da sogn Pieder el dom. In liug impressiunont, monumental, ornaus cun numerusas custeivladads. Denton gliez ei buca quei che fa la gronda impressiun. Igl essenzial da quei liug magnific ei zuppau davos igl aur che tarlischa, davos la monumentalitad che pren bunamein il flad ad ins. Pér cu ins vegn cunscients da tgi ch’ei vegn regurdau cheu, vesein nus ei. Igl ei in il liug che dat perdetga dalla cardientscha d’in carstgaun che ha duront si’entira veta adina puspei dubitau ed enqualga era falliu. E tuttina ha Jesus baghegiau sia baselgia sin quei grep. Sin Pieder.
Jeu sun caminada vinavon e sefermada ella Basilica da sogn Paul. Cheu sun jeu seprofundada en patratgs vid quei um che ha titulau sesez sco «il davos dils apostels». Er sogn Paul era signaus da mendas e fleivlezias. Nus savein ch’el era in um radical e violent, e ch’el ei staus ins dils emprems che ha persequitau ils cristians. Sogn Paul ei denton seschaus en sin Diu e sin la nuviala da Jesus Cristus ed ha midau sia veta diltuttafatg.
Jeu sun beinspert sedumanda: tgei han quels dus sogns da far cun mei e cun mia veta? Tgei vulan els dir a nus ed a nossa Baselgia catolica d’ozildi, en in mund, nua che la cardientscha daventa pli e pli fetg ina caussa privata? Tier omisdus, tier Sogn Pieder sco era tier sogn Paul, anflein nus munglaments en la cardientscha. Els ein buca stai perfetgs. Els han denton giu la curascha da suandar il clom da Diu e da midar diltuttafatg lur veta. Lur cardientscha sebasa pia sin ina profunda fidonza en Diu. Jeu saiel che Diu enquera buca il cartent perfetg, na el avertescha nus tuts dad esser attents e semtgai per siu clom. Adina puspei.
Nus essan pia tuts envidai da suandar siu clom, da viver nossa cardientscha gest oz, en in temps da dubis e grondas midadas, en in temps nua ch’il mund para da star tgaumaler. Nus stuein buca far da heroxs. Nus stuein esser cheu in per l’auter, cun in cor aviert.
Sche nus caminein pia- gest sco sogn Pieder e sogn Paul – cun fidonza, curascha e sinceradad atras nies mintgadi, lu vegnan ils fastitgs da Diu adina puspei vesibels en nies mund.
