La Fundaziun Dr. J. E. Brandenberger ha surdà ils 29 da november a Berna il premi annual – dotà cun CHF 200’000 – a la chantadura, cumponista e performra rumantscha Corin Curschellas. Cun questa distincziun vegn renconuschì ses engaschi extraordinari per mantegnair e dar vinavant las tradiziuns svizras, cun la finamira da salvar quest patrimoni cultural per las proximas generaziuns, scriva la fundaziun.
Ina surpraisa
Il premi n'aveva Corin Curschellas betg enconuschì sco ella ha tradì a la FMR. Tant pli gronda saja stada la surpraisa ch'ella dastga retschaiver il premi Brandenberg 2025. Il tema dal premi 2025 «Mantegnair e dar vinavant las tradiziuns» metta il focus sin il patrimoni cultural immaterial da la Svizra. En in temp da midadas socialas e tecnologicas sveltas vul la fundaziun regurdar ch'ils usits, las istorgias, la musica e l’artisanadi n’èn betg mo perditgas dal passà, mabain furmas d’expressiun viventas da noss’identitad culturala. Ellas stgaffeschan coesiun ed intermedieschan valurs impurtantas.
Il premi mussa a mai ch'ins ha vis che jau fatsch dapli che be musica.
Ils raps sajan in grond agid. Betg be per metter ina part da la vart, quai che na saja betg savens pussaivel en sia branscha, ma era per sa focusar sin novs projects. Corin Curschellas veglia realisar in project musical pli grond e scriver puspè dapli. Auters projects duain avair temp da pudair nascher senza squitsch, grazia al premi.
Corin Curschellas sa mova tranter il jazz, la musica populara e mundiala, chanta en pliras linguas e cumbinescha arranschaments innovativs cun il patrimoni cultural regiunal. Sia carriera artistica ha manà ella a Berlin, Paris, New York e per l’entir mund enturn.
Suenter blers onns a l’exteriur è ella turnada en sia patria grischuna per scuvrir da nov sias ragischs culturalas e dar vinavant quellas. Dapi lura s’engascha ella cun gronda passiun per il stgazi da las chanzuns rumantschas grazia a projects sco Valdun – Voices of Rumantsch, Grischunit, Origins (trad) e La Grischa.
La cumissiun dal premi ha accentuà che las tradiziuns artisticas possian surmuntar cunfins regiunals e promover la chapientscha per la diversitad culturala.
«Bain gudagnà», ha ditg Urezza Famos, co-presidenta da la Lia Rumantscha, en sia laudatio. «Oz surdat la fundaziun Brandenberger ina gronda distincziun a dunna Curschellas – per sia ovra artistica, per ses engaschi e per sia vusch nunconfundibla en la cuntrada musicala svizra».
Era la presidenta dal cussegl da fundaziun ha remartgà: «Dunna Curschellas ha rendì la tradiziun musicala rumantscha viventa e contemporana – betg sco ina curiusitad folcloristica, mabain sco ina furma d’expressiun artistica moderna».
