Il drama «Drii Winter» da Michael Koch, cun il pur da Parpan Simon Wisler en la rolla principala – è vegnì premià a l'occurrenza Premi dal film svizzer a Genevra.
Avant aveva il film gia survegnì ina menziun speziala a la Berlinale 2022. Vitiers aveva la Svizra tramess il film en la cursa, per in Oscar sco meglier film da lingua estra. En ina preselecziun è el dentant vegnì eliminà.
Meglier film documentar è daventà «Cascadeuses» da la reschissura Elena Avdija. Ella mussa trais dunnas che mettan en privel lur corps – cun far stunts per films.
Ursula Meier fa tripletta
Gist trais premis ha recaltgà il drama da famiglia «La ligne» dad Ursula Meier. Ella ha survegnì quel per il meglier scenari, la meglra actura e la meglra segunda rolla feminina. Il film fatg en il Vallais raquinta da violenza feminina, tranter ina mamma (giugada da Valeria Bruni Tedeschi) e sia figlia la pli veglia (actura è Stéphanie Blanchoud).
Premi d'onur per Ruth Waldburger
Il president da la Confederaziun Alain Berset ha surdà il premi d'onur dal film svizzer a la producenta Ruth Waldburger. Quella è creschida si ad Arosa ed a Herisau – e producescha dapi decennis films, da reschissurs indigens sco era da l'exteriur.
