Film, tagl, maletgs, schurnalissem – quai è gia dapi ditg il mund professiunal da Susanna Fanzun. Sco cineasta ha l'Engiadinaisa realisà ils ultims decennis 30 films documentars. Suenter ch'ella ha lavurà dal 1986 enfin il 2013 sco schurnalista, producenta e cineasta da films documentars ha ella fundà il 2012 sia atgna firma da producziun e lavura dapi lura sco cineasta libra.
Uss vegn ella undrada cun il premi da radio e televisiun da la SRG SSR da la Svizra Orientala. Quai per sias lavurs da film en ils secturs da cultura, architectura, inschigneria ed il puresser. Ad ella reusseschia adina puspè da metter en il center da ses films il territori alpin e far accessinbels ils temas sur ils cunfins da la Rumantscha e la Svizra Orientala, quai scriva la SSR Svizra Orientala en ina communicaziun. Il premi da radio e televisiun Svizra Orientala ch'è dotà cun 10'000 francs vegn surdà gievgia saira a Son Gagl.
Grond plaschair dal premi
Che sia lavur ch'ella fa en ina regiun perifera survegn attenziun e vegn appreziada fetschia grond plaschair. Quai ha Susanna Fanzun ditg avant curt envers RTR.
Jau na fatsch betg mes films per survegnir premis. Ma da quest premi hai jau grond plaschair.
Films da Susanna Fanzun
Ultimamain ha Susanna Fanzun realisà in film documentar davart reconstruir e proteger il vitg da Bondo, quai otg onns suenter la bova dal Piz Cengalo ch'ha destruì il lieu. La cineasta ha accumpagnà las lavurs e visità il plazzal grond en Bregaglia durant quatter onns.