30 maratons en 30 dis. Il davos mais è Ruedi Frehner currì 1291 kilometers per rimnar daners per la Fundaziun Sonnenschein che sustegna uffants ch’han cancer e lur famiglias. Igl è in dals gronds projects ch’il Sursilvan ha organisà dapi ch’el ha fundà il 2011 sia atgna fundaziun «Ruedi Rennt». Dapi dus onns è Frehner pensiunà, quai suenter avair lavurà passa 30 onns sin banca, il davos sco manader da la banca UBS a Cuira. Oz è Ruedi Frehner dentant er anc da viadi sco moderatur e speaker d'occurrenzas da sport. Sia vita è fixada cumplainamain sin sport e famiglia.
Jau vi simplamain rimnar daners per sustegnair persunas che ston purtar in satgados pli grev che quai ch’jau hai stuì purtar en mia vita.
Fundaziun «Ruedi Rennt»
Dapi 14 onns s’engascha Ruedi Frehner per persunas handicapadas, quai mintgamai cun projects da currer. In da ses emprims projects è stà en il rom da «Jeder Rappen zählt», in’acziun da collecta da SRF. In ulteriur project – ses anniversari da 60 onns ha el festivà cun currer 24 uras, quai er ensemen cun sia famiglia ed amis. Il project actual «30 maratons en 30 dis» è in dals gronds projects, in project cun bleras istorgias, cun bleras emoziuns, uschia raquinta il Sursilvan da 62 onns.
Fundaziun Ruedi Rennt
Quasi ina vita sin banca
Entras plitost ina casualitad ha Ruedi Frehner chattà in job sin banca. La finala ha el lavurà passa 30 onns sin banca, a la fin sco manader da la banca UBS a Cuira nua ch’el abitescha era cun sia dunna dapi che ses trais buobs han bandunà il dachasa. El fissi gugent daventà sportist professiunal, ma la via professiunala haja er constà uschia, di Ruedi Frehner. Sia vita saja forsa nunspectaculara, però ina vita cunzunt fixada sin famiglia e sport.
Jau sun vairamain in Grischun tras e tras ed jau charez quest chantun che porscha tut quai ch’ins po giavischar.
