Il «Städtlilauf a Glion» ha carmalà las curridras e curriders sco era blers aspectaturs en la citad veglia da Glion. L'emblematica Porta Sura da Glion ha marcà il lieu da partenza sco era l'arrivada da las differentas cursas. Entschet ha l'eveniment cun la categoria «for all», ina cursa per curridras e curridras cun impediments. Las differentas categorias d'uffants èn silsuenter currì ina percurs en la citad veglia. La cursa cun ils pli blers participants è stada quella per in e scadin da 4 ni 8 miglias (6.6 e 13.2 kilometers). Las radund 200 curridras e curridras han absolvì quest percurs ch'è davent da la Porta Sura enfin tar l'acla da Neufundland per vegnir enavos sur il Paradiesgärtli en la citad veglia.
L'uniun «Städtlilauf» tschantscha d'in success. Betg mo l'aura era empernaivla, i era surtratg ed il sulegl ha per muments splendurà. Era las annunzias eran cun radund 470 curridras e curriders pli auta che spetgadas, uschia Marita Leis, la presidenta dal comité d'organisaziun. Tenor ella saja la premiera gartegiada ed la cursa populara duai avair ina cuntinuaziun er l'auter onn.
Nina Zoller ed Andreas Messer gudagnan en la categoria «7130»
Tar la cursa d'eliminaziun cul num «7130» han las curridras ed ils curriders ch'èn sa qualifitgads il suentermezdi pudì sa participar. Ellas rundas d'eliminaziun la saira han Nina Zoller da Mustér triumfà tar las dunnas ed Andreas Messer da Cuera tar ils umens.
