Prest na fiss il psichiater svizzer da renum mundial Carl Gustav Jung betg vegnì medi, mabain plevon sco ses bab e tat. La fin finala èsi dentant stà in siemi ad egls averts, che ha mussà ad el ch'el duess plitost evitar la carriera teologica.
Carl Gustav Jung, u C. G. Jung sco el vegn numnà, era diesch u indesch onns cura ch'el ha apparentamain vis da cler bel di ina figura da Dieu sin in tron sur la baselgia principala da Basilea, che ha laschà crudar in excrement enorm sin questa baselgia. «Quest Dieu ha chajà sin il Münster. E quai è stada ina experientscha schoccanta per il giuven Jung», explitgescha il psicolog ed autur scientific Steve Ayan en l'emissiun «Sternstunde Philosophie» da SRF, sa referind a l'autobiografia da C. G. Jung.
Carl Gustav Jung è naschì il 1875 a Kesswil en il chantun Turgovia. El è dentant creschì si a Basilea, nua ch'el ha era studegià medischina. Suenter ha el lavurà e vivì en il chantun Turitg. El è stà professer a las universitads da Turitg e Basilea, sco era a la Scola politecnica federala a Turitg.
Sco piunier da la psicologia dal subconscient è el er stà in psichiater e psicoanaliticher innovativ. El ha tranter auter collià la psicologia cun la religiun e mitologia. E sias teorias e concepts han influenzà profundamain la psicologia moderna.
C. G. Jung era maridà cun Emma Rauschenbach cun la quala el ha gì tschintg uffants – quatter mattas ed in mat. Sper sia dunna ha el er gì blers onns ina relaziun cun sia stretga collavuratura Toni Wolff, ch'era vegnida ses pli grond sustegn suenter la dispita cun Sigmund Freud. Tant tar occurrenzas privatas sco era publicas al accumpagnavan per part omaduas dunnas.
Pir cun 69 onns, suenter ina greva attatga dal cor è el emoziunalmain sa spartì da Toni Wolff. Curt avant sia mort ha el apparentamain ditg che Toni saja stada «l'odur da sia vita» e sia dunna Emma «ses fundament».
Carl Gustav Jung è mort a chasa a Küsnacht suenter curta malsogna il 1961, curt avant ses 86avel anniversari.
Sco persuna cartenta saja quest siemi ad egls averts, questa allucinaziun, stada per el in cler segn da betg suandar a ses bab ch'era plevon a Basilea e studegiar teologia. Uschia ha el onns pli tard studegià medischina sco ses tat ed è vegnì medi a la clinica universitara da psichiatria Burghölzli a Turitg.
Perscrutar il subconscient per gidar l'uman
E là ha el en la clinica psichiatrica da Burghölzli, nua ch'el ha lavurà cun persunas schizofrenas, per l'emprima giada sviluppà ina metoda per perscrutar il subconscient da nus umans. L'uschenumnada «metoda d'associaziun» che vala sco basa per sia teoria da cumplexs.
Simplifitgà funcziuna questa metoda uschia: Ad ina persuna vegnan ditgs 100 pleds ch'ella enconuscha. E sin quels sto ella mintgamai respunder uschè svelt sco pussaivel cun il pled ch'ella associescha sco emprim cun il pled numnà. Tar il pled planta, pudessan ins per exempel dir «utschè» u «rom». Tut tenor quant svelt ch'il visavi respunda u co la reacziun e la resposta dal visavi è, po quai inditgar in disturbi en il subconscient da la persuna.
«Or dal tip da pleds ch'èn vegnids associads, la durada e l'emoziunalitad, ha Jung concludì sin uschenumnads cumplexs», explitgescha il psicolog Steve Ayan. «Pia ina sort da puncts da conflict inconscients, nua ch'i na va betg bain, per tge motivs er adina.» Tenor Jung è in cumplex ina unitad d'imaginaziuns, sentiments e patratgs en il subconscient ch'influenzescha co nus ans cumportain e pensain senza che nus essan conscients da quai.
Amicizia cun Sigmund Freud
Las perscrutaziuns ch'el ha fatg cun questa metoda d'associaziun e ch'el ha publitgà il 1906 cun sia lavur d'abilitaziun, n'han betg mo gidà d'accelerar sia carriera cun vegnir professer extraordinari da la psichiatria a l'Universitad da Turitg, mabain er purtà renconuschientscha internaziunala: Era da Sigmund Freud, il fundatur da la psicoanalisa e piunier da la psicologia dal subconscient.
C. G. Jung era sa referì en sia lavur d'abilitaziun sin Sigmund Freud ed aveva tramess ad el in exemplar da la lavur. Mez onn pli tard ha quel lura respundì a Jung ed uschia è l'amicizia tranter ils dus psichiaters e scienziads naschida.
L'emprima giada che Carl Gustav Jung e Sigmund Freud èn s'inscuntrads il 1907 a Vienna, han els apparentamain discurrì 13 uras in cun l'auter. Uras ch'els han constatà bain bleras chaussas communablas, dentant era pussaivels conflicts: sco per exempel quai che pertutga l'influenza da la libido sin la psica, u er l'impurtanza da la religiun e fenomens parapsicologics.
Crisa pervia da dispita
Jung è ils onns suenter vegnì in dals stretgs amis da Freud e valeva bainprest sco «prinzi ereditar» dal moviment psicoanalitic. Dentant suenter ch'el ha crititgà publicamain l'idea da Sigmund Freud davart la libido e sia influenza sin la psica, è l'amicizia suenter set onns e pliras rinfatschas persunalas abruptamain era puspè ida a fin il 1913.
Ina separaziun che n'ha betg fatg bain a C. G. Jung cunquai ch'el è apparentamain glischnà en ina crisa da la vita. «El ha descrit quai sco sch'el fiss glischnà en ina stgiraglia. E ch'el sa muveva lura qua enavant ed enavos sa palpond en sia atgna psica», ha ditg il psicolog ed autur scientific Steve Ayan en l'emissiun «Sternstunde Philosophie» da SRF.
Il cudesch cotschen
Las experientschas che C. G. Jung ha fatg cun perscrutar intensivamain ses subconscient, ses siemis e sias fantasias, ha el nudà e malegià durant blers onns en in cudesch cotschen. In cudesch ch'è pir dapi il 2009 accessibel a la publicitad e ch'è actualmain er da vesair en l'exposiziun «Cuntradas da l'olma» en il Museum naziunal svizzer a Turitg.
-
Bild 1 von 5. Il cudesch cotschen da C. G. Jung è era gia stà da vesair a New York. Bildquelle: Keystone.
-
Bild 2 von 5. Pagina or dal cudesch cotschen. En il stil d'in manuscrit medieval. Bildquelle: Fundaziun da las ovras da C. G. Jung, Turitg.
-
Bild 3 von 5. Pagina or dal cudesch cotschen. La sfera è in simbol da l'integritad e dal sez. In motiv che cumpara savens en ils dissegns da C. G. Jung. Bildquelle: Fundaziun da las ovras da C. G. Jung, Turitg.
-
Bild 4 von 5. Maletg da pazient 006. C. G. Jung lascha malegiar ses pazients e pazientas sco part fixa da sia metoda terapeutica. La metoda sa numna «Imaginaziun activa». Bildquelle: archiv da maletgs, Institut C. G. Jung Turitg.
-
Bild 5 von 5. «Cuntradas da l’olma». In sguard en l’exposiziun en il Museum naziunal svizzer a Turitg a favur dal 150avel anniversari da C. G. Jung. Bildquelle: Museum naziunal svizzer.
Questa fasa ha C. G. Jung en mintga cas descrit sco ina fasa en sia vita, nua ch'el era per uschè dir a l'ur da la narradad e ch'el è sa fatschentà fitg cun ils maletgs dals «archetips» da sia olma. Sch'igl è propi stà uschè dramatic sco Jung ha descrit questa lunga fasa n'è betg cler.
La confruntaziun cun l'agen subconscient ha en mintga cas purtà fritg. Perquai che sin basa da questas experientschas internas ha el sviluppà sia atgna teoria ch'el ha numnà la «psicologia analitica». Quai per sa differenziar da Sigmund Freud cun sia «psicoanalisa».
«L'individuaziun» u «Ve quel che ti es!»
Uschia è C. G. Jung daventà quel che nus enconuschain: in piunier da la psicologia dal subconscient. Empè da mo interpretar il passà, vuleva el cun sia teoria gidar a l'uman da chattar tar sasez. El ha perquai sviluppà en la psicologia in maletg dal mund che contemplescha l'uman a moda cumplessiva – pia er cun ils siemis, cun ils giavischs e cun il mitus.
In da ses intents centrals vegn savens parafrasà cun: «Ve quel che ti es!» Quai che munta tant sco ch'il subconscient ans mussa ina via a nossa vaira persunalitad. C. G. Jung ha numnà quest process da sviluppar sasez ed integrar tut ils aspects da la persunalitad per vegnir quel ch'ins è per propi, «l'individuaziun». Insatge che cuzza l'entira vita tenor C. G. Jung e che ha la finamira ch'ins daventa autentic tras las singulas fasas da la vita.