Il nov bajetg da la clinica per uffants e giuvenils duai avair 21 plaz staziunars e set plazzas en la clinica dal di. Ina scola en la clinica, sco er ina halla da gimnastica tutgan er tar il nov project. La clinica per uffants e giuvenils duai star a disposiziun per persunas minorenas cun ina diagnosa psichiatrica e che ston vegnir ospitalisads temporarmain. Ils custs totals dal project muntan a 33 milliuns francs.
Grazia a quest nov bajetg po dad in maun vegnir serrada la staziun serrada provisorica cun tschintg letgs per giuvenils en la chasa dal persunal dals servetschs psichiatrics. Da l'auter maun pon uffants e giuvenils che vegnan tractads per raschuns da mancanza da plaz ordaifer il chantun, puspè turnar e vegnir tractads en Grischun.
Investiziun chantunala è cas spezial
Da principi na vegnan betg pli pajadas contribuziuns extraordinarias dal chantun ad ospitals e clinicas, quai gia dapi il 2012. Investiziuns èn da pajar a lunga vista or da entradas dad assicuranzas e dal maun public per prestaziuns prestadas. Dapi che la staziun per giuvenils è vegnida averta n'ha la fundaziun da la psichiatria per uffants e giuvenils da quella giada, betg pudì far reservas che pudessan vegnir duvradas per finanziar il nov bajetg. Ina finanziaziun cun agid da la psichiatria per creschids n'è betg pussaivla perquai che la lescha excluda quai.
Il basegn surregiunal e chantunal è dentant avant maun, perquai che la glista da spetga per la tgira ambulanta sco er staziunara per giuvenils ed uffants è vegnida fitg lunga. Tals temps da spetga pon avair consequenzas fitg negativas per ils minorens pertutgads, perquai ch'ils sintoms pon sa pegiurar ferm ed in return en la vita normala vegn engrevgià ed er retardà.
