Il di en scolina a Breil cumenza adina cun trais rituals. Rituals sajan impurtants, di Andrea Cathomas-Friberg ch’è scolasta da scolina a Breil. L’emprim ritual saja ch’ils uffants dastgan far termagls, lura datti la chanzun da bainvegni ed il terz ritual è da guardar sin la tabla dal program dal di. Rituals portan enorm bler per l’entir di. Ins ha in auter sentiment dad ir enturn in cun l’auter.
Durant il temp d’advent vegnan ulteriurs rituals latiers. Per exempel in chalender d’advent. Ils uffants han pudì far propostas, tge bunas ovras ch’els pon far in a l’auter. Sin anghels èn questas ideas vegnidas scrittas e mintga di dastga in uffant trair ora in anghel.
Jau giavisch als uffants ch’els chattan il ruaus intern. Muments per tadlar ina istorgia betg animada, simplamain in cudesch da maletgs u da chantar ina chanzun.
Savens èsi però plitost agitaziun a chasa durant il temp d’advent. Andrea Cathomas-Friberg emprova da prender ora questa agitaziun da la scolina. E betg be rituals gidan ed èn impurtants, mabain er l’atmosfera. Perquai èsi en scolina a Breil durant il temp d’advent plitost stgir.
