Sepultura en transfurmaziun - «Uman, ti es terra e daventas terra»

Insacura sa tschenta la dumonda: tge duai capitar cun mes corp suenter mia mort? 10% da la populaziun sa decida ozendi per ina sutterrada, 90% per ina cremaziun. In’autra opziun n'exista betg en Svizra.

Omaduas metodas pratitgadas han però effects negativs sin l’ambient: entras chemicalias e materials betg decumponibels po la sutterrada donnegiar il terren e las auas, e la cremaziun dovra blera energia e lascha enavos rument spezial.

En Svizra s'engaschan duas uniuns per ch’ina terza opziun daventia legala: la cumpostaziun funerala. La Marella s’inscuntra cun Sarah Joliat da l’uniun «Humusation Suisse» e cun Lina Hänni da l’uniun «Werde Erde».

Las protagonistas d'udir en La Marella:

I dat diversas uniuns europeicas che s’engaschan per la legalisaziun da la cumpostaziun funerala. In problem è dentant la mancanza da datas scientificas da preschentar a la politica.
Perquai èn las egliadas per il mument drizzadas vers la Svizra, nua ch’il SHIFT (Swiss Human Institute of Forensic Taphonomy) ha gist lantschà in project da perscrutaziun che vegn a cuzzar ils proxims quatter onns.
Igl è l’emprima giada che era l'uschenumnada humusaziun vegn realisada cun corps dad umans.

Duas metodas cun il medem resultat final

Cura ch’ins discurra da cumpostaziun funerala manegia ins ozendi ina da questas duas metodas pli effizientas ed ecologicas:

La humusaziun

Avrir la box Serrar la box

• Il process ha lieu or en il liber.
• La procedura cuzza circa in onn.
• I dovra persunal per controllar ch’il protocol vegnia respectà (p.ex. che l'umiditad constettia).
• Pauca infrastructura è necessaria. La humusaziun pudess avair lieu en ina partiziun deditgada dad in santeri.
• Na vegn enfin ussa anc betg pratitgada cun umans.