Il problem è vegnì cun il possess.
L’obligaziun d’avair nagin sex, da viver virginal, e ch’ils umens vulan regular la sexualitad da las dunnas è in process d’isolaziun ch’è vegnì cun l’agricultura. Cun l’agricultura hai dà possess e cun il possess saja il problem vegnì, din Carel van Schaik ch’è biolog d’evoluziun e scienzià dal cumportament e Kai Michel ch’è istoricher e scienzià da litteratura en vita e cretta. La decleraziun: Il patriarc vul che ses figl erta ses possess. Ed el vul ch’igl è ses figl e na betg in ov dal cucu. Quai vul dir che la sexualitad feminina sto vegnir controllada. Las dunnas vegnan sfurzadas da viver virginal per ch’il patriarc po esser segir ch’igl è ses uffant. Dunnas virginalas vul er dir dunnas giuvnas. Ellas n’han anc betg lur persunalitad da sa dustar. Sur dad ellas san ins disponer, ellas pon ins furmar.
Cun l’agricultura sa mida er la sexualitad en general. Tuttenina è la omosexualitad stada in problem. Sch’il figl dal patriarc è omosexual finescha la lingia. Ma er la religiun cristiana gioga ina rolla.
Tar ils chatschaders e las rimnadras è l’entir spectrum da la sexualitad stà pussaivel.
E sch’i vegn oz appellà a la natira, lura è quai in’emprova da giustificaziun, din Kai Michel e Carel van Schaik. Ina malgiustia culturala vegn declerada cun pretender ch’i saja la voluntad da la natira. U en la Bibla hai num ch’i saja la veglia da Dieu. Perquai che Eva è sa cumportada mal, han tut las dunnas stuì vegnir chastiadas.
