Spitex Selva - «Senza la Spitex na fiss jau betg pli qua»

• Quai di Bernhard Stoffel da Trin. Suenter in’operaziun è el vegnì tramess memia baud a chasa. La tgirunza da la Spitex ha percurschì ch’insatge n’era betg bun ed è ida cun Bernhard Stoffel tar il medi. Quai ha salvà sia vita.
• Era Philipp Camathias da Laax è fitg cuntent cun la lavur che la Spitex fa. Ma il cumenzament èsi stà da s’endisar ch’insatgi gida, di el. Ed er da sa disar che adina autras persunas vegnan a chasa en la sfera privata e per clientas e clients savens er en la sfera intima.
• Er Heidi Camathias, la dunna da Philipp, è cuntenta ch’i dat la Spitex. Trais giadas al di vegn ina persuna da la Spitex per sa gidar. Ella persula na vegniss betg da dumagnar tut quai, conceda Heidi Camathias en la Marella.

Nus vegnin fitg datiers – e quai n'è betg adina simpel per la glieud.

1 / 5

Legenda: Bernhard Stoffel: Client, senza la Spitex na fiss el betg pli qua RTR

2 / 5

Legenda: Philipp Camathias: Ha dapi 34 onns MS ed è avisà sin la tgira da la spitex RTR

3 / 5

Legenda: Heidi Camathias: Confamigliara che tgira ses um Philipp Camathias RTR

4 / 5

Legenda: Isabella Albin: Lavura per la Spitex Selva RTR

5 / 5

Legenda: Anni Adam: Manadra da la Spitex Selva RTR

Anni Adam che maina la Spitex Selva e che tgira las vischnancas da Falera, Laax, Flem, Trin, Sagogn e Schluein, fa cunzunt quitads pervi da la birocrazia. Mintg’onn vegn adina dapli.

Ins di ch'ins vul pli pauc – ma i vegn adina dapli.

Nagins quitads sto la Spitex Selva far pervi da la situaziun da persunal. Il mument sajan els en ina situaziun fitg confortabla. Els hajan fitg bleras annunzias sin plazzas, er da persunas diplomadas da tgira. Pli bleras che quai ch’i ha plazzas.