Bellaluna, ils 19 d’avrigl 1988: Paula Roth vegn assassinada a moda brutala. Cun 11 cuntelladas è l’ustiera vegnida chattada en il suler da sia ustaria. Prontas eran duas Coca Colas, ch’ella vuleva servir – tranter auter a ses agen morder. Igl è in'istorgia che tracta da misteris zuppads e dad in'engurdientscha da daners ch'ha la finala manà a la mort tragica da l'ustiera Paula Roth.
Saira criminala cun RTR
Sco preavertura dals 34avels Dis da litteratura datti il venderdi, ils 31 d'october, ina saira criminala. Ils auturs, Gion Caviezel e Fabia Caduff, raquintan da l’omicidi tragic da Paula Roth – la dunna ch’è daventada ina legenda a Filisur – e tge regurdanzas dal cas ch’èn restadas 37 onns pli tard a las abitantas ed als abitants da Filisur.
Tranter auter vegn l’anteriur president da vischnanca da Filisur a pled, che sa regorda anc fitg bain vi da l’ustiera ch’aveva in grond cor per animals. Ma era cun il postin da Paula Roth – che passava pli u main mintga di sperasvi tar l'ustiera – han ils auturs discurrì. Schizunt Paula Roth sezza è d'udir, grazia a diversas cassettas nua ch'ella aveva registrà istorgias ord sia vita che n'era betg adina simpla.