Il mintgadi da l'uvestg Joseph Maria Bonnemain cumenza a las tschintg la damaun. Per sa preparar sin il di, fetschia el ina mes'ura uraziun e dettia ina baterlada cun Dieu. Suenter la messa vai vinavant en biro nua che sia assistenta ha semtgà l'agenda cun tut ses termins. D'in cuntin scalina in apparat – ed el mida dal telefonin, tar il computer vi sin il tablet. Sper las brevs survegn el mintga di var 150 mails e quai da plevons che dovran ses agid, da medias e da ses persunal. El ha da preparar sesidas, ina conferenza da medias ed il predi.
Esser uvestg è fitg strentg – quai n'avess jau betg spetgà.
Bler laud, dentant er critica
L'atmosfera en l'uvestgieu saja sa midada dapi che Jospeh Maria Bonnemain è uvestg – quai è d'udir da tuttas varts. «Pliras persunas en l'uvestgieu na pudevan betg pli savurar ina l'autra. Quai è per part anc adina uschia. L'uvestg emprova dentant d'unir l'uvestgieu. Quai dovra temp – el è dentant sin buna via», di l'avat da la claustra da Mustér, Vigeli Monn. Il vicari da l'uvestg Andreas Fuchs di, ch'il tun saja sa midà: «La moda da discurrer in cun l'auter è autra. I vala uss da tschertgar soluziuns e betg pli ils culpants».
Crititgà vegn che l'uvestg na mussia betg adina colur. La presidenta dal cussegl sinodal da la baselgia catolica da Turitg, Franziska Driessen-Reding, pretenda che l'uvestg sa posiziuneschia pli cler per exempel puncto la benedicziun da pèrs omosexuals. «Mussar colur gea, dentant sin ina moda che nagin sa senta exclus u offendì», respunda Joseph Maria Bonnemain sin quella critica.
Las dunnas e la giuventetgna
L'uvestg ha er engaschà pliras dunnas en ses team – sia assistenta persunala, la scheffa da communicaziun – e per l'emprima giada fan dunnas era part dal cussegl diocesan, la direcziun da l'uvestgieu. «Umens datti avunda en la baselgia. Mintgin ha sias abilitads – a nus umens manca dentant questa sensibilitad». Plinavant ha el fundà in cussegl da giuventetgna che duai s'engaschar en l'uvestgieu per ils interess da la glieud giuvna. I dettia avunda gremis classics en l'uvestgieu – la giuventetgna duai purtar in nov vent.
Sgnoccas durant filmar
Igl è stà spezial che l'uvestg è insumma stà d'accord da vegnir accumpagnà cun la camera en ses mintgadi. El è stà avert ed autentic. Jau hai pudì filmar el era en situaziuns plitost intimas, per exempel durant ch'el fa uraziun u durant il trenament da forza, in mument ch'el va pulitamain a ses cunfins. Mintgatant fascheva el era sgnoccas cun mai, pertge ch'jau saja anc adina vid filmar. L'uvestg ha bler umor, quai n'avess jau betg spetgà.
