Urs Niederegger è dapi 45 onns chanzlist a La Punt Chamues-ch, e cun quai il chanzlist ch'è il pli ditg en uffizi en tut la Svizra. Suenter in emprendissadi en l’administraziun communala da Schlarigna è el vegnì clamà en la vegliadetgna da 20 onns en la chanzlia da ses lieu da vischinadi. Sia lavur sco chanzlist è sa midada fermamain dapi il 1980.
Igl è sa midà fitg bler. L’emprim er jau in simpel administratur che s’occupava da fitg bleras raubas, tranter auter er copulaziuns. Entant sun jau daventà ina sort impressari.
La fin dal 2024 avess l’Engiadinais cuntanschì la vegliadetgna da pensiun. Entant ha el ina cunvegna da pudair restar anc ina legislatura enfin la fin dal 2027. Durant quest temp duai la vischnanca publitgar duas plazzas da lavur, che Urs Niederegger ha fatg ils ultims decennis. Sper il manar la chanzlia, ha el numnadamain er l’uffizi da construcziun sut el.
Midadas da presidi e suprastanza, il chanzlist è restà
Durant ses temp sco chanzlist ha Urs Niederegger gì en tut 6 presidents communals sur el. In dad els era perfin ses agen frar. Ch’el ha cun sia savida e rutina er ina gronda influenza e pussanza en vischnanca, na snega el era betg. Ch’el haja dentant adina agì en l’interess da «ses cumin».
Quai è propi uschia ch'jau hai ina gronda pussanza. Tschertas persunas vesan quai sco problem. Ma la gronda part betg – crai jau. Jau m’hai adina engaschà a favur da nossa vischnanca.
Urs Niederegger è divorzià. Ses status d’amur actual circumscriva el cun «liber». La cumpagnia – spezialmain quella da dunnas – giaudia el dentant explicitamain, uschia il bab da duas figlias creschidas e non da dus biadis.
Ina da sias passiuns è il capricorn. En sia abitaziun ves'ins passa 100 figuras, cornas u decoraziuns da l’animal alpin. Urs Niederegger sez è er naschì en il segn zodiac da capricorn. E quest onn sa legra el spezialmain sin il temp da chatscha, cun quai ch’el po ir a chatscha da capricorns.
Plans per il temp suenter la pensiun haja el er gia. Ensemen cun in’amia ha Urs Niederegger numnadamain fundà ina firma d’immobiglias.