L’artista universala, oriunda da Laax, ha in agen biro da communicaziun e grafica, e lavura per ils pli divers clients. Dentant quasi mai per la baselgia.
Far art figurativ per ed en ina baselgia è pretensius.
Cun far art per la baselgia ins sa movia adina sin glatsch satigl, perquai ch’ins stoppia far adatg da betg violar sentiments religius ed era chapir endretg cuntegns religius. Ed alura na tutgia l’art natiralmain er betg il gust d’in e mintgina. Da chattar in access e chapir art abstract saja da l’autra vart era betg adina simpel per il public.
La rolla che la baselgia aveva pli baud han oz surpiglià las interpresas ed il maun public.
Dentant luvrass Anna Rita Stoffel fitg gugent dapli sin incumbensa da la baselgia, perquai che tenor ella pon ins elavurar fitg bain tematicas da la cardientscha da moda artistica. En la religiun sco era en l’art giaja quai per la vita, il senn da la vita, la vardad, l’amur e la mort.
L'art guarda sin las chaussas cun ina tut atgna perspectiva. El reflectescha e metta en dumonda. I dovra curaschi da la vart da la baselgia d'acceptar quai.
Sco che la baselgia pudess profitar d’art contemporan e viceversa, sco che baselgia e religiun pudessan inspirar artists, quai explitgescha l’artista en Vita e cretta.
