Il servetsch divin, che vegn celebrà sin tut il mund mintgamai l’emprim venderdi dal mais da mars, vegn preparà mintg’onn d’in auter comité da dunnas en in auter pajais. Per ils 4 da mars da quest onn èn quai dunnas ord l’Engalterra, la Valisa e l’Irlanda dal Nord che surpiglian quella funcziun. Quai vul dir, ellas defineschan la liturgia, creeschan e realiseschan uschia il program per la sontga Messa. Quel vegn alura surpiglià da tut las plaivs cristianas che fan part dal Di d’uraziun mundial.
Il Di d’uraziun mundial è il pli grond moviment ecumenic da dunnas insumma. Quellas dunnas derivan da las pli differentas culturas cristianas e vivan las pli diversas tradiziuns.
Cun urar ed agir da cuminanza èn dunnas da var 170 pajais sin tut il mund colliadas ina cun l’autra. Quai è propi fascinant ed enritgint.
Jau vi As porscher avegnir e speranza è il motto dal Di d’uraziun mundial da quest onn. Sco che quel motto vegn realisà, tge muntada che il Di d'uraziun mundial ha per la Svizra ubain per la Svizra rumantscha e tge projects d'agid umanitar che vegnan mintgamai sustegnids, da quai raquinta Maria Chatrina Gisep Hofmann da Scuol en Vita e cretta. Ella organisescha il Di d'uraziun mundial a Scuol per las plaivs da Guarda enfin Sent ed è danovamain era coordinatura naziunala.