Ellas èn giuvnas ed ellas èn stars sin YouTube ed Instagram. Ozendi atgnamain nagut spezial. Priscilla Schwendimann e Claudia Steinemann èn dentant tuttas duas era plevonessas. E Claudia sto cumbatter cun la malsogna ADHS, Priscilla cun ses coming-out sco dunna omosexuala, ch’è creschida si en ina baselgia independenta che na tolerescha betg omosexualitad.
E gist quai èn tematicas ch’ellas discutan cun lur community sin lur chanal «Holy Shit» – avertamain e cun ina purziun umor. En general tematiseschan ellas la baselgia e la cardientscha, l’esser giuven, la sexualitad ni la sanadad psichica.
Nus n'avain nagin recept general, tut è er in zic in experiment.
Cun «Holy Shit» vulan las duas plevonessas cuntanscher dapli glieud – oravant tut glieud giuvna – ed intermediar a quella la fascinaziun da la cardientscha cristiana ed er ils avantatgs da far part a la Baselgia refurmada.
Vita e cretta ha discurrì cun Priscilla Schwendimann davart motivaziun, finamiras, resistenza e tabus.
In giuven è dacurt entrà en la Baselgia refurmada, nua che mia collega Claudia è plevonessa. El ha argumentà, ch'el veglia entrar, perquai che la baselgia haja pudì pledentar el per l'emprima giada insumma cun «Holy Shit». Quai fa enorm plaschair.
