Siglir tar il cuntegn

Header

audio
Essan nus tuts gamers?
Or da Nus Gamers dals 02.07.2021.
laschar ir. Durada: 11 minutas 44 Secundas.
cuntegn

Gaming Nus essan tuts gamers

I dat blers differents geners da gamers. Intgins giogan sin il telefonin, tschels sin il computer ed autras sin la consola.

Mobil

Cunquai ch’il telefonin è uschè pitschen n’ha el betg la medema forza sco ina consola concepida explicitamain per games u sco in computer. Uschia èn ils games plitost simpel, sch’ins cumpareglia cun tschellas plattafurmas. Ma sco smartphone-gamer pon ins quasi adina prender enta maun l’apparat per ses games preferids, sch’il temp lubescha.

PC

Tut tenor game e pretensiuns a la prestaziun po in PC esser «be» il laptop per il homeoffice u perfin ina detga «maschina». Il PC pon interessads ed entusiastas adattar specificamain a lur basegn, dependent da las componentas ch’il gamer installescha. Interagir po il PC-gamer cun mieur e tastatura, joystick u controller etc.

Consola

La consola è ina sort computer ch’è concepì en prima lingia per far il gamen. Cun in controller proprietar a la consola han ins la controlla sur il gieu. Ma LA consola na datti betg: ils trais fabricants gronds da consolas èn Microsoft, Sony e Nintendo – mintgin cun ses agen sistem, sia atgna tecnologia e per part agens gieus.

Era sch’i vegn dà sin differents apparats, sch’i dat dispita sche quels che giogan sin il telefonin sajan propi gamers u tge games che valan insumma sco tals – tuts han communabel ch’els giogan gieus digitals.

Tut quels games funcziunan be grazia al svilup tecnic en il mund dal computer. Ed ensasez èn gea er il telefonin e la consola in computer, simplamain cun in auter niz ch’il computer classic.

Sch'i va per «gamear» datti differenzas. Tge ch'è forsa per intgins in passatemp è per auters il hobi preferì u perfin ina carriera aspirada. A la fin quinta co ch'in e scadin valitescha l'impurtanza dal gaming en sia vita. Ed uschia vegn ins er a sa decider per ina plattafurma che correspunda il pli fitg al stil individual.

audio
Highscore downsides
ord Nus Gamers dals 02.07.2021.
laschar ir. Durada: 13 minutas 34 Secundas.
Tge fan gamers?
Legenda: RTR

Ils games

La schelta da gieus è gronda, ed i dat era differenzas tranter las categorias e sutcategorias. Tut tenor sch'igl è in «shooter» u in «jump 'n' run», in gieu stategic u in'aventura virtuala.

Las categorias en general

Avrir la box Serrar la box
  1. games d’action
  2. games d’aventura
  3. gieu da rollas
  4. simulaziuns
  5. gieus da sport
  6. puzzle
  7. gieus inactivs

Tar tuttas categorias datti er sutcategorias. Uschia per exempel tar games d'action: Ego-Shooter, Survival u er mix cun in autra categoria sco cun gieus d'aventura.

In tal mix da gieus d'action ed aventura fitg popular è tranter blers auters per exempel «Red Dead Redemption 2».

Charles Nguela spielt Red Dead Redemption 2 – Let's Play @ SRF zwei

En gieus da rollas surpiglia il gamer ina rolla en il mund virtual e agescha lura era uschia. Istorgias captivantas e la funcziun impurtanta dal character per l'istorgia fa ora in gieu da rollas.

In exempel forsa betg pli uschè actual ma che mintgin vegn ad enconuscher è «Pokémon».

Tge vegn endament en la sparta games da sport? Probabel pulit spert ils gieus da FIFA. Ballape. Ballape virtual.

fifa meme
Legenda: RTR

Tar ils gieus da simulaziun è il «Landwirtschafts-Simulator» fitg popular, almain sch'ins guarda sin ils gieus svizzers. Tgi ch'ha gì gugent il «Goat Simulator» vegn forsa er ad avair in plausch cun «Just Die Already».

Il linguatg «svelt» da gamers

Sche gamers giogan online, vul dir cunter u cun autra glieud, lura vegn era communitgà in cun l’auter. Savens capita quai via ils uregliers, ma mintgatant era via il chat che sa chatta en il gieu. Gist sch’i sa tracta da gieus nua ch’i va spert sco per exempel shooters n’han gamers betg il temp per scriver romans in a l’auter – uschia ch’els dovran abreviaziuns.

Las pli impurtantas abreviaziuns durant ina partida online èn:

Abreviaziuns da gamers

Avrir la box Serrar la box
  • AFK = Away from keyboard = Ins n’è betg cuntanschibel per in curt mument
  • GG = Good game = Gratular in l’auter per la partida ch’è stada interessanta u buna
  • NPC = Non-playable Character = Las figuras/persunas en il gieu ch’il gamer na sa betg controllar
  • KDR = Kill/Death – Ratio = Cumparegliar quantas giadas ch’ins è mort en relaziun cun ils mazzaments d’auters
  • XP = Experience = «Experience» dovran ils gamers bler per vegnir tar il proxim level, per exempel en gieus da rollas u shooters
  • PVP = Person vs. Person = Ina partida tranter nua che be duas persunas giogan cunter in l’auter
  • HP = Health Points = Il dumber da puncts da vita avant ch’ins mora
  • EZ = Easy = Sche la partida è stada memia simpla da gudagnar

Gamers han savens da cumbatter cun pregiudizis, uschia n'hajan gamers per exempel naginAs partenariAs, sfarlattian lur temp u sajan amocaders potenzials. Cun quels ed auters puncts ha er sa fatschentà SRF Virus en il True Talk.

True Talk – «Gamer n'èn nagins amocaders» (tudestg)

RTR Social

Artitgels legids il pli savens