Attestat dal medi sur WhatsApp

La pagina d'internet AU-scheine.de porscha tenor atgnas indicaziuns attest dal miedi mo cun paucs clics. Da nov datti quest servetsch era per la Svizra.

Maletg da simbol.
Legenda da maletgs: Maletg da simbol. Pixabay

Attestats da medis da l'ester sajan valaivels, entant ch'il medi ha ina lubientscha. Ils attests da la pagina d'internet tudestga vegnan d'ina practica da medis a Hamburg. Quels hajan la lubientscha.

Per il mument po la pagina d'internet mo dar in attest per esser cun auras. Sin la pagina ston ins inditgar ils sintoms: mal il chau, fevra, mal las ureglias ed uschè vinavant. Silsuenter ston ins inditgar ristgs spezials, sco malsognas cronicas ni gravidanza. Sch'ins inditgescha sintoms che na tutgan betg tar in dafraid ni ristgs spezials, lura na survegn'ins nagin attest, mo l'avis d'ir tar in endretg medi.

Sch'ins survegn in attestat, lura vegn quel via WhatsApp. El custa 10 francs e tegna maximalmain trais dis. Ins survegn mo dus attests ad onn, quai per evitar ch'ins nizzegia il servetsch memia savens.

Critica d'uniun da medis

L'uniun da medis a Turitg èn da prinzipi per la pussaivladad da laschar vegnir in attest sur WhatsApp. L'associaziun da medis FMH – associaziun tetgala en Svizra – han ditg envers la «Sonntagszeitung», ch'els na sustegnan betg quella pussaivladad. Quai na saja betg insatge serius. Vinavant fan els attent sin problems cun la segirtad da datas. In medi da Basilea ha perfin ditg, ch'i saja fitg malprecaut da nizzegiar quest servetsch.

Ils manaders da la pagina AU-schein.de ha la «Sonntagszeitung» confruntà cun quellas reproschas: La fatschenta tudestga na vesi insumma nagins problems.

Autur/a: Flurin Clalüna