Co betg crudar en trics dals catalogs da vacanzas

En catalogs vesan tut ils hotels ora paradisic. Ma savens vegn detg manzegnas sco stailas. La riva è lunsch davent, la chombra è vegliandra, la canera insupportabla. Ils fotografs da hotels san, co ins po far vesair ora pli attractiv ina destinaziun. Ins po dentant demascrar quests trics.

Legenda da maletgs: Keystone

Fotografias cun in angul lartg laschan parair chombra e bogn pli grond, l'aua dal bogn vegn anc colurada bel turchis e l'hotel vegn fotografà uschia ch'ins na vesa betg ils bajetgs dasperas. Per evitar ch'ins sa tschentia en ina baracca èsi impurtant da daventar detectiv, avant cudeschar las vacanzas.

Maria Kressbach, redactura ed experta per dumondas da consum tar SRF1, cusseglia da mirar la destinaziun sin google streetview. Uschia vesan ins co il hotel, la riva ed il conturn vesan ora. Lura èsi impurtant da leger tranter las lingias.

bogn ch'ins po stgaudar: vegn betg stgaudà
hotel central: canera
per quels che tschertgan ruaus: lungurus
tip secret: ti entaupas tes vaschins
riva datiers: tranter 50 meters e 5 kilometers è tut pussaivel

Era gidaivel pon recensiuns e commentaris d'osps esser, per exempel sin tripadvisor e holidaycheck.

Sch'ins sa tschenta tuttina en ina baracca u sche per exempel il bogn empermess n'è nagliur d'enturn, lura èsi impurtant da rimnar cumprovas, videos e fotografias. Las cumprovas pon ins mussar a l'hotel ni a l'organisatur da viadis.

Autur/a: Angela Hendry