Cura po la vischnanca pretender da midar las scrittiras?

Tenor il Tribunal federal a Losanna vala il principi: Il domicil principal d'ina persuna che na lavura betg sur sasezza è là, nua ch'ella abitescha per pli lung temp e va davent da là di per di a la lavur. Quai perquai che la lavur saja essenziala per segirar l'existenza e quai saja insatge durant.

Controlla d'abitants
Legenda da maletgs: La controlla d'abitants è responsabla per decisiuns en connex cun la dimora durant l'emna. Keystone

Mintgin che vul restar per pli lung temp dimorant durant l'emna – pia lavurar ed abitar en in auter lieu che quai ch'el ha las scrittiras – sto cumprovar che quest principi na vala betg en ses cas. Per exempel entras colliaziuns extraordinarias cun il lieu da domicil:

  • sch'ins turna pliras giadas l'emna per tgirar ils geniturs
  • sch'ins sa participescha intensivamain ad uniuns (ins sto però pudair cumprovar, quanta lavur che quai dat)

Be la famiglia na tanscha betg

Cumprovar ina stretga relaziun cun l'atgna famiglia (mamma, bab, fragliuns u tat e tatta), quai na tanscha betg. Il Tribunal federal è numnadamain da l'avis che questa relaziun vegnia cun la vegliadetgna adina pli flaivla. Cunzunt a partir da 30 è quai in ferm argument per la vischnanca che vul far midar las scrittiras.

Er quant ditg ch'ins lavura gia en in lieu, è decisiv. A partir da 5 onns è quai er in ferm argument cunter la dimora durant l'emna.

Tge influenza ha il partenari u la partenaria?

Sch'ins viva ensemen cun il partenari u la partenaria, è la situaziun clera. I na dovra gnanc in concubinat ch'igl è gia in ferm argument per il lieu, nua ch'ins viva ensemen sco domicil principal. Il medem vala era per la lètg.

La finala èsi però la decisiun dal chantun u da la vischnanca, sche e cura ch'els vulan ch'insatgi fa midada cun las scrittiras. Las ultimas decisiuns da dretgiras mussan però che quai vegn tendenzialmain fatg plitost pli baud che pli tard.

Autur/a: Gion Gieri Flepp