Evitar reclama en chascha da brevs

Ils ins han gugent ellas, auters pli pauc – las reclamas en chascha da brevs.

Chascha da brevs cun blera reclama.
Legenda da maletgs: Chascha da brevs cun blera reclama. Keystone

Bleras giadas chatt'ins reclamas e flyers da stizuns, restaurants ubain figls politics en chascha da brevs. E quai era sch'ins ha vid la chascha in tatgader «Bitte keine Werbung».

La protecziun da consuments (Stiftung für Konsumentenschutz) cumbatta gia dapi onns encunter questa situaziun malempernaivla. La Posta che reparta la pli gronda part dals fegls sgulants e da gasettas, differenziescha tar la reclama tranter uffiziala e commerciala.

Las uffiziallas pon els metter en stgaffa da brevs, era sche ei stat si in tachader da "negina reclama." Ei setracta lu numnadamein da infurmaziuns dalla vischnaunca, dal chantun sco era da chaussas politicas.

  • Sco commercialas valan reclamas ch'èn per in e scadin plitost irrelavantas. Tar quels ch'han si in tatgader cunter reclamas, n'avessan quests flyers e gasettas betg da vegnir en la chascha da brevs.
  • Auter vesa quai ora tar las reclamas adressadas. Quellas vegnan squitschadas cun in'adressa persunala. Il bler vegnan quellas da firmas nua ch'ins ha gia empustà ina giada insatge.

Tgi che vul evitar almain ina part da las reclamas adressadas, po sa registrar sin l'uschenumnada glista da robinson (mira link giusut). Cun questa registraziun pon ins sa proteger da las reclamas betg giavischadas.

Tar la Protecziun dals consuments pon ins empustar in set da tatgaders. Quel cuntegna tatgaders per metter sin la chascha da brevs, sco era tatgaders per metter sin la reclama ch'ins vul refusar e trametter enavos a la firma.

Autur/a: Ivo Orlik