Fotografar en bogns: vegn bainbaud il scumond?

En differents bogns en Germania èsi be pussaivel d'entrar en in bogn avert, sch'ins tatga giu la camera dal telefonin cun in tatgader spezial. Ina mesira che duai proteger ils giasts da vegnir fotografads senza lubientscha. En Svizra na paran da questas mesiras dentant betg d'esser necessarias.

Fotografar en bogns è delicat uschè spert che persunas nunenconuschentas èn el maletg.
Legenda da maletgs: Fotografar en bogns è delicat uschè spert che persunas nunenconuschentas èn el maletg. Keystone

En blers bogns en Svizra vala in scumond da fotografar tenor l'urden da chasa. Quai scumond na vegn dentant betg respectà consequentamain. En general admoneschan ils guardiabogns lura, sch'insatgi fa fotografias nua che autras persunas – persunas nunenconuschentas – èn en il maletg. Fotografar è numnadamain mo lubì cun il consentiment dals pertutgads. Plinavant admoneschan ils guardiabogns era persunas che paran da far fotografias d'insatgi en il zuppà.

Sensibilisaziun enstagl da scumond total

Mesiras uschè severas sco en la Germania nua ch'igl è scumandà dal tuttafatg da far fotografias na paran betg necessarias en Svizra. L'uniun svizra da bogns cuverts e bogns averts è dentant era sensibilisada sin la problematica, ed ha uss lantschà in'acziun da placats e flyers. Quels duessan far attents la glieud che fotografar è mo lubì tar persunas che han dà lur consentiment.

Laschar ir video «Fotografar en bogns averts»

Fotografar en bogns averts

0:48 min, dals 12.6.2017

Autur/a: Selina Chistell