Tge autotests valan insatge?

Pli baud stuev'ins ir tar il medi per laschar far tests dal corp. Uss datti adina dapli pussaivladads da far quai sez a chasa cun in test cumprà en l'apoteca. Per l'apotecra Monica Fehr ed il medi Rolf Thouet fan dentant betg tut ils tests senn da far persul a chasa.

L’autotest da HIV pon ins dapi stad 2019 cumprar en apoteca.
Legenda da maletgs: L’autotest da HIV pon ins dapi stad 2019 cumprar en apoteca. Keystone

Testar quant alcohol ch'ins ha bavì, mirar sch'ins è allergics sin gluten u mesirar il cuntegn da fier en il saun. Quai èn tenor l'apotecra Monica Fehr per exempel tests, che fan bain senn da cumprar e far a chasa.

Be i dat era tests ch'ella recumonda betg da far persul a chasa, uschia per exempel il test da HIV u in test davart la capacitad da procrear (Zeugungsfähigkeitstest). Quai ha dentant betg da far cun l'exactadad dal test. Quels tests ch'ins cumpria en apoteca hajan quotas da sur 95%, sco Monica Fehr di.

Er il medi da la medischina interna, Rolf Thouet, accentuescha medemamain la problematica da far in test da HIV a chasa. El è en general in zichel pli critics envers tals tests.

Autur/a: Pietro Jacomet