Vegan è en vogue - ma er sanadaivel?

Mangiar vegan, vul dir evitar products animals sco charn, pesch, ovs u latg, è «in». Ils sortiments cun products vegans en las stizuns daventan adina pli gronds. Er adina pliras ustarias porschan spaisas veganas. Fan ins cun in nutriment vegan dentant davaira er insatge bun per la sanadad?

Differenta verdura.
Legenda da maletgs: Mangiar vegan è «in». pixabay.com

Tenor Nick Vonzun, manader da la terapia da nutriment en il spital chantunal, poi esser sanadaivel da sa nutrir vegan. Per quai stoppia ina persuna dentant disponer d'ina gronda savida davart il nutriment. En inqual fasas da la vita duess ins dentant desister da sa nutrir vegan. «Uffants e dunnas ch'èn en speranza u tezzan han in basegn augmentà d'insaquantas substanzas nutritivas. Quels na pon els betg cuvierer cun sa nutrir vegan», explitgescha Vonzun. Er a persunas pli veglias u malsaunas scusseglia el in nutriment vegan.

Tge far per evitar mancanzas da substanzas nutritivas?
Cun sa nutrir vegan ristg'ins dad avair ina mancanza d'intginas substanzas nutritivas. «Substanzas problematicas èn tranter auter proteins, calzium, fier, vitamin B-12 u er zinc», uschia Vonzun. Savens hajan persunas che maglian vegan memia pauc da quellas substanzas. Tut segund tge substanza che manca sa quai avair differentas consequenzas: Cun memia pauc proteins giajan musculs a perder. Memia pauc fier haja per consequenza ch'ins haja memia pauc sang. Tras ina mancanza da calzium daventia l'ossa porusa. «Quai sa a lunga vista er chaschunar osteoporosa». Ma tge san ins far per evitar ina mancanza da talas substanzas nutritivas? «Impurtant è segir da magliar avunda products da plantas cun blers proteins. Quai pon esser products da soja, sco chaschiel da soja», declera Vonzun. Er aditivs alimentars sco vitaminas fetschian senn per cuvrir il basegn.

Tgi che veglia dentant simplamain sa nutrir sanadaivel, na sto betg exnum mangiar vegan: «Per sa nutrir sanadaivel dastgan ins e duess ins er mangiar products d'animals cun mesira».

Autur/a: RTR/cl