Las directivas publicisticas dad RTR èn dapli ch'ina ovra directiva – ellas èn l'expressiun da nossa chapientscha schurnalistica. Ellas defineschan, co che nus ademplin noss mandat da service public, tge standards da qualitad che valan e nua che vegnan fixads ils cunfins da nossa lavur publicistica.
In cumpass per il mintgadi schurnalistic
Las directivas servan sco mussavia e punct da referenza per tut las schurnalistas ed ils schurnalists da RTR. Ellas èn disponiblas online da tut temp ed ans gidan a decider, er en situaziuns cumplexas, e quai a moda professiunala e cun responsabladad.
- Pertge èn las directivas publicisticas per RTR uschè centralas?
Las directivas publicisticas èn noss fundament. Ellas ans dattan segirezza en il mintgadi e gidan da prender decisiuns cleras e chapiblas, er en situaziuns difficilas. Gist en in temp, nua che la confidenza en las medias è centrala, èn ellas indispensablas. - Las directivas publicisticas èn liantas – dentant era dinamicas. Co resentis Vus il svilup da quellas en il mintgadi?
Nus badain adina puspè che novas tecnologias u svilups da la societad dovran adattaziuns. Gist tar l'intelligenza artifiziala avain nus stuì reponderar pliras giadas, co che nus las utilisain a moda raschunaivla e cun responsabladad. Las directivas n'èn betg ina regulaziun fixa, mabain in instrument viv – e precis quai è la fermezza. - Datti in exempel, nua che las directivas han facilità la decisiun tar ina tematica difficila?
Gea, per exempel tar la rapportaziun davart proceduras giudizialas. Las directivas gidan a mantegnair ils dretgs da persunas ed ad ademplir a medem temp l'incumbensa d'infurmaziun. Ellas defineschan per exempel clers criteris, cura ch'ins dastga numnar nums – e cura betg.
Per las superiuras ed ils superiurs da RTR èn las directivas publicisticas la basa per garantir la qualitad e per prender decisiuns publicisticas fundadas.
Las directivas publicisticas èn liantas per tut ils collavuraturs e tut las collavuraturas da RTR. A medem temp pon ellas vegnir consultadas publicamain – la transparenza è numnadamain ina valur centrala da nossa lavur. Il public po uschia chapir e suandar, tenor tge criteris che nus selecziunain, elavurain e publitgain cuntegns.
En blers cas en las directivas pli strictas, che quai ch'è giuridicamain admissibel. Vul dir: quai ch'è giuridicamain lubì, po publicisticamain gia esser problematic. En cas da dumondas delicatas, vegn perquai involvida la schefredacziun RTR e tut tenor er il servetsch giuridic da la SSR.
Las directivas laschan spazi per l'atgna responsabladad. Ellas porschan in'orientaziun, n'èn dentant naginas directivas fixas. Las directivas èn dinamicas: ellas vegnan sviluppadas vinavant cuntinuadamain – en furma participativa ed averta per tut las collavuraturas e tut ils collavuraturs da RTR.