En atgna chaussa - Midadas da program tar Radio RTR

Ils ultims mais è RTR sa fatschentà intensivamain cun il program da radio – cun ina clera finamira: adattar la purschida anc meglier als basegns dal public.

L'intermediaziun d'infurmaziuns duai restar cumpacta, relevanta e datiers da las audituras e dals auditurs. Rubricas appreziadas duain vegnir sviluppadas vinavant e rubricas novas vegnan a purtar in vent frestg.

Da quai resultan a partir dal 1. d'october 2025 intginas midadas da program tar Radio RTR:

Las midadas las pli impurtantas en survista

• «Magazin» – la nova emissiun da profundaziun
  Mintga di a las 12:00 e las 17:00 furnescha l'emissiun da profundaziun «Magazin» las pli impurtantas novitads, reportaschas, intervistas ed analisas. En furma cumpacta e cun focus regiunal, rapporta l’emissiun da quai che muventa il Grischun. Il magazin vegn a star a disposiziun en furma digitala sco podcast directamain suenter l'emissiun lineara.
• «Marella» – da nov la sonda
  L'emissiun da profundaziun «Marella» vegn emessa da nov la sonda, da las 11:00 fin las 12:00 sco punct fix emnil – per explitgar e metter en context, sajan quai fenomens novs, u istorgias pauc enconuschentas.
• «Artg musical» – nov la dumengia bun'ura, cun giasts
  Per las amaturas ed ils amaturs da la musica datti da nov mintga dumengia, da las 09:00 fin las 10:00 – in'ura «Artg musical». «L'Artg» daventa in'emissiun discursiva cun giasts. En il center na stat betg mo il tadlar musica, mabain er il discurs davart quella.

• «Gratulaziuns» – nov ina mes'ura pli baud
  L'emissiun populara «Gratulaziuns» vegn da nov directamain suenter il «Magazin» da mezdi – mintga di a las 12:30.
• Kikeri kids – il gieu per uffants emnil
  Cun il «Kikeri6» usità entschavais Vus Voss di cun buna luna – e, cun in pau fortuna, cun in gudogn, actualmain èn quai bons dal Volg. Il gieu da la damaun che vegn giugà da glindesdi fin venderdi sin Radio RTR è simpel, spert e cun in zic fortuna era lucrativ.
  Da nov tutga mintga sonda las 08:18 la tribuna als uffants en la vegliadetgna da 5 fin 12 onns (scolina e scola primara) – co sa participar? E vualà:

• «Live da Berna» – l'emissiun mensila cun vista naziunala
  Ina giada il mais emetta RTR live da la Chasa federala a Berna – entamez il center politic da la Svizra. L'emissiun «Café federal» porscha ina survista cumpacta dals fatgs actuals da politica ed metta a lieu ils svilups ils pli impurtants. En il focus stattan era temas socials e culturals da las autras regiuns linguisticas da la Svizra.

Tge croda davent?

• Cun repassar il program da radio prenda RTR era cumià da singulas emissiuns. Las emissiuns da musica «Stailalva» e «La populara» vegnan stritgadas dal raster da radio. La musica resta dentant ina part centrala dal program: sper l'emissiun «Artg musical», ch'è concepida da nov, metta RTR er en il futur paisa sin la producziun da musica audiovisuala da festas da chant e musica, sco era sin ils dus formats etablids «Noss chors» e «L'instrumentala». Tar quests dus formats han en l'avegnir il public, ils chors, las societads da musica u singulas persunas da la scena da musica la pussaivladad da metter ensemen sezs las uras da musica.
• L’ura moderada «Semperverds» vegn stritgada. Quella musica specifica vegn dentant era vinavant ad esser udibla en il program da musica quotidian da radio RTR.
• Emissiun da la damaun – nov cun moderaziun singula: La co-moderaziun da la damaun vegn stritgada. En l'avegnir maina ina moderatura u in moderatur sulet tras l'emissiun da la damaun – quai, tranter auter, per dar in cler e dapli profil a la moderaziun.
• L'emissiun «Rendez-vous am Mittag» – l'emissiun da SRF – vegn stritgada dal program da Radio RTR.

6 dumondas a Flavio Bundi, schefredactur RTR

Avrir la box Serrar la box

1. Pertge è il program da radio vegnì surlavurà?
   Da temp en temp ston ins metter en dumonda l'agen program. Ed igl è simplamain er impurtant da sa sviluppar cuntinuadamain e da tadlar sin ils basegns dal public. En in temp ch'il diever da medias sa mida fermamain, vulain nus orientar nossa purschida da radio a moda anc pli sistematica tenor ils basegns da noss public. Ils umans giavischan infurmaziuns cumpactas e relevantas ed in accumpagnament tras il di – precis quai vulain nus porscher.
2. Tge è l'idea davos il nov «Magazin»
   Il «Magazin» è noss nov format da profundaziun che furnescha duas giadas al di ils cuntegns ils pli impurtants. En furma cumpacta e cun in focus regiunal, rapporta l’emissiun da quai che muventa il Grischun. Uschia restain nus al puls da la regiun e purschain orientaziun.
3. Co tuna Radio RTR a partir dal 1. d'october? Radio RTR daventa pli cumpact, pli pregnant – e resta cun quai era vinavant credibel e simpatic. La damaun datti pli paucas contribuziuns furmadas. La moderaziun accumpogna las audituras ed ils auditurs cun cumenzar il di – persunal e focussà. L'avantmezdi viva noss radio dal barat cun il public cun rubricas popularas sco «Linguarias» u «Nossa cuschina». Il nov «Magazin» duai dar orientaziun – duas giadas al di – en ina furma cumpacta e clera. E la saira accumpagnain nus il public tras la saira sontga, cun musica, vuschs e temas che tractan il di.
4. Co resta RTR er en il futur datiers al publicum? La proximitad vegn creada entras relevanza, nossa lingua e preschientscha. Noss focus resta sin fermas istorgias regiunalas, per rumantsch sco lingua dal cor – e sin emissiuns ch'accumpognan il mintgadi dals umans. Il nov raster è in pass per rinforzar questa vischinanza. E nus introducin novas rubricas che promovan il dialog cun il public – per exempel la «Dumonda da l'emna», nua che nus lain udir las vuschs or da la populaziun davart temas actuals.
5. Pertge vegn l'emissiun «Gratulaziuns» emessa da nov a las 12:30?
   Cun ses cumportament da diever e ses resuns ha il public mussà cleramain, ch'il temp sur mezdi è spezialmain popular. Cun il nov plazzament directamain suenter il «Magazin» a las 12:30, lain nus dar a tuttas persunas ina meglra pussaivladad da tadlar e participar – era per quellas e quels che lavuran.
6. Tge cuntegns auditivs èn en l'avegnir da chattar sin las plattafurmas digitalas?
   Nus pensain, planisain e coordinain oz radio sur tut las plattafurmas. Ils cuntegns na ston betg mo funcziunar live, mabain er esser accessibels a moda digitala. Il nov raster è in pass en questa direcziun – cun formats clers che funcziuneschan bain, era online.

Cun il nov program da radio gizza e sviluppescha Radio RTR vinavant ses profil. RTR duai era vinavant esser part dal mintgadi da las audituras e dals auditurs e dar cun ses program da radio identitad ed in dachasa.

Las midadas da programm fan part d'ina strategia a lunga vista, per sviluppar vinavant il Radio RTR sco ferm med d'infurmaziun ed accumpagnament.

Avais Vus dumondas, critica u laud areguard il (nov) program da RTR? As drizzai senza retegnientschas 📲via mail a flavio.bundi@rtr.ch ubain direct via 📞telefon +41 58 136 30 24