Schaner
L'entschatta da l'onn ha RTR publitgà ina nova seria d'architectura ed avert portas da chasas extraordinarias. En trais episodas ha il duo Anita Simeon Lutz e Livio Chistell visità sis chasas: ina renovaziun massiva a Claustra, in chalet da vaider ad Alvagni, ina chasa dispitaivla da low-tec ad Igis, in refugi modern a Vignogn, in monument malchapì da betun ad Ardez ed in giuvel crappus a Malögia.
Portas avertas – la seria d'architectura
Suenter 62 emnas d'evacuaziun ha la populaziun da Brienz/Brinzauls puspè pudì turnar a chasa. A partir dals 26 da schaner era il vitg puspè avert per tuttas e tuts. RTR ha realisà dus films da Cuntrasts davart las sfidas e la speranza en connex cun la bova da Brinzauls. L'emprim film cun il titel «Responsabladad al limit – in onn cun Daniel Albertin» raquinta dal carussel d'emoziuns e dat in'invista davos las culissas. Il segund film «Brinzauls: Bandunar e spazzar – u turnar e restar» sa fatschenta cun l'avegnir dal vitg, che resta intschert era sche la vita dastga puspè turnar a Brinzauls.
Brinzauls
Favrer
Dals 6 fin ils 22 da favrer han gì lieu ils 25avels gieus olimpics Milano Cortina 2026. Swiss Olympic ha tramess en l’Italia dal Nord 91 sportists e 84 sportistas – quai fa totalmain 175 persunas. 23 medaglias olimpicas hai dà per la delegaziun svizra – uschè bleras sco anc mai! La passlunghistas Nadja Kälin da San Murezzan ha procurà per in mument istoric: ella gudogna sur 50 km la medaglia da bronz. Cun quai è ella l’emprima passlunghista svizra che ha pudì gudagnar ina medaglia singula als gieus olimpics. En il sprint da team aveva Kälin gia fatg argient ensemen cun Nadine Fähndrich. En il skicross gartegia al Grischun Alex Fiva il coup: l'um da 40 onns va per la medaglia da bronz.
Ils 7 da favrer ha gì lieu in dals pli populars tils da tschaiver en Surselva: il til da tschaiver a Trun. Tar l'ediziun da giubileum da 40 onns èn passa 30 furmaziuns sa participadas. RTR ha accumpagnà quest event cun in'emissiun live, numerusas intervistas ed in sguard en l'istorgia dal tschaiver a Trun.
40 onns til da tschaiver Trun
Mars
Il mais ha tar RTR il prim da mars cumenzà cun in Livestream dal cortegi da Chalandamarz a Zuoz. Ed il suentermezdi han Oceana Galmarini e Romana Costa manà tras l'emissiun live sin SRF. In'emissiun cun elements en las quatter linguas naziunalas e cun in sguard davos las culissas da la tradiziun.
Ils 8 da mars lura il grond di decisiv: il suveran svizzer è s’exprimì en favur d’ina ferma SRG SSR ed ha refusà l’iniziativa «200 francs bastan!» (iniziativa SRG SSR). La SRG SSR ha beneventà questa conferma d’in service public multifar e digital cun fermas ragischs en las regiuns.
Curt suenter la votaziun cuntanscha nus l'infurmaziun che noss directur Nicolas Pernet daventa nov schef Purschida SRG SSR e banduna RTR. Cun be 40 onns ha el surpiglià il 1. da schaner 2021 il timun da RTR – suenter ina fasa transitorica sut Pius Paulin. Ils 27 da mars 2026 ha Nicolas manegià a l'info da personal: Ich bin dann mal weg...
Avrigl
A la surdada dals Swiss Press Awards a l’Universitad da Berna èn collavuratur:as da RTR, RTS, RSI e SRF vegnid:as onuradas en las categorias audio, video e scienza. En la categoria video han Curdin Fliri e Patrick Capaul cuntanschi plazza 3 cun il film «Mission Pee Wee». Els accumpognan ils dus talents dal HCD, Gianluca Andri e Demian Casutt, sin lur via al pli prestigius turnier da talents giuvens dal mund a Québec. Ellas pussibiliteschan da dar in sguard davos las culissas – fin ch’i vegn decidì tgi che dumogna il team. Cordiala gratulaziun!
Seria Missiun Pee Wee
Dals 27 fin ils 30 d'avrigl han las scolaras ed ils scolars da la tschintg- e sisavla classa da Zernez cun in team da RTR durant in'emna realisà diversas uras da radio live, creà lur atgna emissiun dal «Minisguard», cumponà ina chanzun cun in video, fatg cuntegn per las plattafurmas online ed era reclama per l'emna da project. Nov durant quell'emna era l'ura tranter las 11:00 e las 12:00. Lura pudeva ins tadlar l'emissiun da radio e medemamain guardar ella via livestream.
Matg
Cun RTR eras vus dals 14 fin ils 17 da matg live a la festa da musica federala a Bienna. Surtut la musica da parada ha attratg in public immens – tant live sin plazza sco er online: dapli che 500'000 visitas han guardà ils livestreams e videos sin www.rtr.ch/emf26. Ils passa 25'000 musicants e musicantas han fatg or da Bienna ina vaira citad da musica. RTR ha rimnà ina massa impressiuns ed emoziuns da Bienna per guardar suenter. Tut las registraziuns da la festa da musica federala chattais Vus sin rtr.ch/play. Là chattais per exempel er l'emissiun dals «Cuntrasts» EMF26 Marsch! Al puls da paucas e paradas. Claudio Spescha ha accumpagnà la Societad da musica Trun e la Musikgesellschaft Union Chur.
Zercladur
Cordiala gratulaziun! Ils 4 da zercladur èsi stà clar: RTR ha ina nova directura - Simona Caminada è vegnida elegida sco successura da Nicolas Pernet. La dunna da 39 onns è activa dapi prest 15 onns en differentas funcziuns per la SRG SSR. Simona Caminada dat dumogn a l’entir repertori dal schurnalissem local fin a la rapportaziun internaziunala; il davos ha ella rapportà per SRF da Roma.
Ils 14 da zercladur ha il Grischun elegì la regenza: Valérie Favre Accola surpiglia il sez da Jon Domenic Parolini ch'ha cuntanschì la limita da temp en uffizi. Cunquai returna la Partida populara svizra suenter 18 onns puspè en la regenza grischuna. Cun l’elecziun da Favre Accola sco cussegliera guvernativa èn davent dal proxim onn per l’emprima giada insumma duas dunnas en la regenza grischuna.
Tar l'elecziun dal parlament gudogna la PPS: Cun ina cumpart da bunamain 30% è ella da nov la pli gronda fracziun en il Cussegl grond. Il Center perda sis sezs, fertant ch'ils Verds pon da nov furmar in'atgna fracziun.
A la festa da lutga dals 13-06-2026 a Scuol ha triumfà da moda suverana il favurit e retg da lutga Armon Orlik. Sin sia via a la victoria ha el mess en dies ils frars Schneider e quai avant culissa perfetga sin la Motta Naluns. Ils cumbats en ils quatter rintgs ha RTR emess via livestream. Il rintg pincipal ha commentà Roman Dobler, redactur da sport da RTR ensemen cun Corsin Jörger, anteriur lutgader da Domat