Cun 33 onns, ina lutga federala, in kranz e gronda engraziaivladad per tut quai ch'il sport da lutga ha dà ad el terminescha Corsin Jörger sia carriera. Il mument-clav per sia decisiun è stada la lutga chantunala a chasa a Domat, la stad passada.
Jau sun stà uschè trumpà sco anc mai en mia carriera. Mia prestaziun a la lutga da chasa è ida cumplet en las chautschas. Per mai èsi lezza saira stà cler, uss èsi finì.
Quai che vess constà per Corsin Jörger dad era gist communitgà, n'ha dentant betg constà en quel mument da la turmpada per sia dunna Nadja. Prender la decisiun da terminar la carriera ord in mument da frust na saja betg bun. Suenter 20 onns cun tanta pissiun per il sport da lutga stoppi el prender il temp da ponderar e na decider tut a la bahuta. Tge che Corsin ha fatg. I sajan stadas lungas discussiuns cun sia dunna ils ultims mais. Entant ch'i constat uss per ils geniturs da 3 mattatschas ed in buob en las vegliadetgnas da 14, 8, 5 e 3 onns ha ses stretg conturn en la famiglia da lutga betg vulì crair sia decisiun. Surtut ses frar giuven Marc, sez lutgader, ha empruvà da persvader da cuntinuar.
1 lutga federala – 1 kranz – bleras regurdientschas
Corsin Jörger guarda enavos en engraziaivladad sin ils blers bels ed intensivs onns sco lutgader. Il sport da lutga cun tut sias valurs da respect, fairness, sinceradad, colleghialitad e tradiziun han marcà e furmà el sco carstgaun. Valurs ch'el vul era dar vinavant a ses 4 uffants.
Corsin Jörger ha survegnì la pissiun per il sport da lutga quasi en tgina. Sia famiglia, ina da lutgaders. Ses aug Reto Attenhofer, in lutgader federal. Ch'è suenter sia carriera stà blers onns manader tecnic dals lutgaders grischuns.
Spezialmain en memoria resta a Corsin Jörger sia unica festa da lutga federala, l'onn 2022 a Pratteln cun bleras impressiuns e muments da pel-giaglina en l'arena cun passa 50milli aspectaturs. Ma era las lutgas da muntogna tradiziunalas sco Schwägalp, Schwarzsee, Weissenstein.
En ses palmares hai tanschì per in soli kranz. L'onn 2019 a la lutga chantunala a Cazas. I avess senz'auter pudì esser daplirs. Bleras giadas ha be in quart punct mancà per il kranz. La motivaziun ha il lutgader rumantsch mai pers pervia da quai.
Famiglia – Professiun – Lutgaders giuvens
Suenter ponderaziun madira penda Corsin Jörger uss pia sias chautschas da lutga vid quella ominusa gutta. Prioritad ha uss sia famiglia, sia dunna Nadja e ses uffants Gioia, Alisea, Aria e Giuliano. E sia professiun. Dapi 10 onns lavura Corsin Jörger che ha emprendì bostger sin la plazza da golf a Domat e fa da present la scolaziun da greenkeeper. Ma dal tut senza lutga na vai betg. Il club da lutga da Domat stat a cor ad el e duai avair in avegnir. Sco trenader dat el vinavant fascinaziun e tecnica da quest sport a la generaziun giuvna da lutgaders. E tgi sa, in bel di forsa era a ses figl.
