Cun Armon Orlik ha il Grischun in dals pli ferms lutgaders dals davos onns en sia equipa. Dapi la stagiun excepziunala l’onn 2016, cun la participaziun a la lutga finala da la festa federala ad Estavayer, è l'um da Maiavilla senza dubi il leader da l’equipa grischuna. Orlik è dentant er ina ferma pitga sin livel da la federaziun da la Svizra dal Nordost NOS e sin livel naziunal. El è il leader da la delegaziun grischuna a Pratteln.
Il titel dal retg da lutga è in siemi – vi da quel lavur jau.
Ensemen cun Samuel Giger e dus, trais auters lutgaders ha la Svizra dal Nordost bunas schanzas da puspè gudagnar il titel dal retg da lutga. Quai fiss l’emprima victoria dal titel dapi il success da Jörg Abderhalden l’onn 2007. Dapi lura è adina in lutgader bernais daventà retg da lutga.
Armon Orlik – da la lieur al chatschader
En la vegliadetgna da 21 onns è ida si la staila dad Armon Orlik. A la festa federala ad Estavayer aveva il giuven lutgader fom, el aveva quella levezza ch'i dovra per esser ferm, el ha mussà sport da lutga frestg e sin in top livel. Trais onns pli tard a la festa a Zug mancava quella levezza forsa in zichel. Uss, anc ina giada trais onns pli tard, è Armon Orlik puspè en la situaziun ch'el po far la chatscha. El è pli madir e sa uss anc meglier tge ch'i dovra per daventar retg.
Corsin Jörger – nominà sco ultim
Tut autra è la situaziun per Corsin Jörger: Il lutgader da Domat era atgnamain vegnì nominà sco um da reserva ed ha stuì sperar ch'in auter lutgader sa fa mal ubain na po betg sa participar a la festa federala. Natiralmain che nagin spera quai – dentant precis quai è capità e Corsin Jörger: El ha fatg il pass dal lutgader da reserva al participant a Pratteln.
Sepp Coray – dapi 20 onns a tut las Festas federalas
Dapi 20 onns è Sepp Coray da Sent part da la gronda famiglia da lutga. Ensemen cun in per amis dal Club da lutga da Flem va Sepp Coray – che stat entant cun sia dunna a Sent – a questas festas. Surtut pervi dal sport e pervi da l'atmosfera tut speziala. Perquai ha Sepp Coray fatg pront tut per ir er questa giada a la festa e sa legra immens.
Sch'ins è amatur da questa scena, alura sto ins ir a la Festa federala.