L'Indoor Sounds è a fin e tar l'organisatur Florian Zanin resta surtut in sentiment – dischillusiun. Igl haja gì pli paucs visitaders e pli paucas visitadras che spetgà, numnadamain enturn 900. Spetgadas sajan stadas 1'000 persunas. Suenter tanta lavur d'organisaziun saja donn, sche la glieud restia tuttina pli gugent a chasa.
Trumpà sun jau schon – ins prepara gea tut per nov mais e sa legra ed emprova da far insatge per la regiun, lura èsi donn, sche uschè pauc vegn enavos.
Questa bilantscha na giaschia dentant segir betg vi dal nov num, manegia el. Avant aveva l'eveniment num «Indoor Festival» – tuts hajan dentant adina numnà el mo «Indoor», perquai saja el segir, che quai n'haja betg gì in'influenza.
Futur intschert
L'organisaziun saja dentant stada fitg buna, ed er il resun dals giasts saja stà per gronda part positiv, uschia l'organisatur Florian Zanin. Tuttina na sappia el anc betg, co ch'i vegnia ad esser en il futur cun l'indoor Sounds e sch'i vala anc la paina. L'emprim sto el anc sa revegnir da la fin d'emna – e cura ch'il comité d'organisaziun ha cifras pli exactas, vegn guardà vinavant.
Era RTR è stà da la partida: Tar nossa photocab da 360° han tut las visitadras e tut ils visitaders gì la pussaivladad da far ensemen cun amias ed amis cools videos, in'experientscha speziala amez la festa.
Ussa scuvrir tut ils videos da 360°:
Nov num e nov temp
Indoor Sounds è la nova versiun per l'enconuschent Indoor Festival. In nov num ed in nov temp. Quai cun las experientschas da l'anteriur festival ch'era il matg, in temp cura che nagut marscha tenor Florian Zanin ch'è il manader dal comité d'organisaziun da l'Indoor Sounds. E midà haja era la direcziun musicala da las duas sairas. Enstagl da hip hop e rock aud'ins ussa rock e pop.
Duas terzas dals custs che nus avain èn expensas per bands e tecnica.
Per organisar l'entira occurrenza dovri lavur che dura bler u pauc durant nov mais. Avant, durant e suenter l'arranschament èn lura radund 50 persunas engaschadas. Ed era questa giada hajan ils organisaturs la fin finala d'ir sur ils cudeschs, e lura ponderar co vinavant, ha Florian Zanin gia ditg avant il festival cun avair il budget en chau.
