Siglir tar il cuntegn

Header

visual colurì cun scritg 50:50
Legenda: Acziun da diversitad ed egualisaziun da la BBC BBC
cuntegn

Medias 2021 Diversitad ed inclusiun tar RTR

Radund 50% da nossa societad èn dunnas. Sch’ins sfeglia dentant ina gasetta, guarda in’emissiun da televisiun u taidla ina contribuziun da radio, vesa quai savens or auter. Umens èn per regla ils experts e vegnan avant pli savens. Era tar RTR n’è quai betg auter. Quai vul RTR uss midar.

Per midar quai ha RTR lantschà l’entschatta da favrer 2021 l’acziun interna «50:50» che sa basa sin in project da la chasa da medias publica BBC da la Gronda Britannia. La finamira è d’augmentar la cumpart da dunnas en ils formats da radio, televisiun ed online. Uschia noteschan las collavuraturas ed ils collavuraturs dal program da RTR regularmain quantas dunnas e quants umens ch’èn vegnids a pled en lur emissiuns u contribuziuns. Silsuenter vegnan questas cifras evaluadas e discutadas. Durant il mars mussa la statistica p.ex. la suandanta situaziun sur l’entir program RTR: 57% umens e 43% dunnas èn vegnidas a pled. La finamira è da cuntanscher a media vista in resultat equilibrà e persistent da 50% umens e 50% dunnas.

Prisca Bundi, producenta Radio RTR
Legenda: Prisca Bundi RTR
Chattar dunnas che vulan s’exprimer avant la camera u avant in microfon n’è betg adina simpel en la lavur da mintgadi e dovra in engaschi ed in sforz supplementar da las collavuraturas e collavuraturs da RTR. Quel sforz vala dentant la paina per cuntanscher ina valur ‘50:50’
Autur: Prisca BundiProducenta Radio RTR

Perquai elavura RTR actualmain ina glista d’expertas che facilitescha la tschertga da persunas en situaziuns, nua ch’i sto ir svelt. Plinavant dat RTR paisa en il program, ma er en la communicaziun a la lingua inclusiva ed a la diversitad.

Il moderatur Livio Chistell.
Legenda: Livio Chistell RTR
Per mai è il tema diversitad fitg impurtant. Cura che jau tschertg persunas per mias istorgias, less jau avair ina variaziun tant pli gronda tge che pertutga idioms, schlattainas, vegliadetgnas e derivanzas. Quella ambiziun sforza da tschertgar protagonistAs ordaifer mia ‘bubble’ e quel sforz ha ina gronda plivalur per mia lavur, per mias emissiuns e la fin finala era per noss public.
Autur: Livio Chistellredactur social / moderatur Telesguard

Diversitad sin tut ils secturs

L’equiliber tranter umens e dunnas è dentant mo in aspect da la diversitad, auters èn per exempel differentas derivanzas, vegliadetgnas, genders, identitads ed orientaziuns sexualas, persunas cun in impediment e persunas da differentas religiuns. Da tractar insatgi auter pervia d’in tal aspect è inacceptabel. Uschia tematisescha RTR la diversitad en la populaziun sin tut ils chanals dal program. Quai per exempel cun la seria auditiva «1.7 milliuns», nua che persunas cun in impediment stattan en il center, u era cun metter il focus sin tematicas sco quellas da LGBTQ+. RTR prenda serius sia incumbensa en connex cun la diversitad, tant sco chasa da medias per la Svizra rumantscha sco era sco patruna da lavur. Per sviluppar vinavant nossa interpresa en direcziun da dapli diversitad, vegnan sviluppadas cuntinuadamain mesiras cun questa finamira.

audio
Diversitad tar RTR
05:29 min, Actualitad dals 19.04.2021.
laschar ir. Durada: 05:29 minutas.

Artitgels legids il pli savens

Scrollar a sanestra Scrollar a dretga