Siglir tar il cuntegn

Header

video
LGBTQ+: Tge munta quai insumma?
Or da Giuventetgna dals 19.03.2021.
laschar ir. Durada: 1 minuta 47 Secundas.
cuntegn

Declerà curt e cumpact LGBTQ+: Tge munta quai insumma?

La scursanida LGBTQ+ è il term general per la communitad da persunas che n'èn betg eterosexualas. Pia dunnas che stattan sin dunnas, umens che han gugent umens, persunas che na sa sentan betg sco la sexualitad da lur corp, persunas che na fan betg ina differenza tranter las schlattainas, pia feminin u masculin, ed anc bler dapli.

audio
LGBTQ+: Tge vul quella scursaniziun dir
ord Actualitad dals 17.03.2021.
laschar ir. Durada: 3 minutas 35 Secundas.

Tge muntan ils differents bustabs?

Ils terms ch’ins dovra savens èn eterosexual ed omosexual. Ma i dat anc bler dapli che be quellas duas orientaziuns sexualas. Il term general per l'entira communitad betg eterosexuala è il pled englais «queer».

LGBTQ+

Lesbic: Quai èn dunnas che stattan sin dunnas.

Gay: Quai èn persunas che stattan sin la medema schlattaina. Il bler è manegià umens che han gugent umens, ma ins sa era duvrar gay per ina lesba.

Bisexual: Quai èn persunas che sa sentan attratgas dad umens e dunnas.

Transgender: Quai èn persunas che na sa sentan betg sco la sexualitad da lur corp. Per exempel ina persuna che sa senta sco um, è dentant en in corp d’ina dunna.

Queer: Tut las persunas che n'èn betg eterosexualas.

+: Il plus è qua per includer tut las persunas che na s’identifitgeschan betg cun ina da las gruppas numnadas.

Ed il rest?

Mintgatant vegn la scursanida engrondida cun ils bustabs I, A e P sin LGBTIAPQ+.

Intersexual: Persunas intersexualas èn persunas che na s’identifitgeschan betg sco um u dunna. Quellas persunas han caracteristicas sexualas d’in um e d'ina dunna. Per exempel sa quai esser che quellas persunas han tar la naschientscha omadus organs sexuals. Ina persuna po per exempel avair ina vagina ma era fitg blers ormons masculins sco testosteron.

Asexual: Persunas che na san betg bajegiar si ina relaziun sexuala cun insatgi. Quellas persunas n'han betg il desideri suenter sex.

Pansexual: Persunas che na differenzieschan betg tranter feminin u masculin. Els na s’identifitgeschan betg sco um u dunna ed ad els n'emporta era betg tge sexualitad che lur partenaria u partenari ha.

Ma adatg, i dat era furmas maschadadas e malgrà la diversitad anc ina massa divergenzas. Pertge mintgina e mintgin resenta sia sexualitad auter e perquai na pon ins tar tuttas gruppas betg generalisar la definiziun.

RTR actualitad 07:00

Artitgels legids il pli savens