Siglir tar il cuntegn

Header

In purtret da Marco Giger.
Legenda: Marco Giger abita dapi sis onns a Turitg. RTR
cuntegn

Grischun vs. Turitg «Ti maltgiert schwul cun tai vi jau avair da far nagut!»

Marco Giger raquinta sia istorgia, co ch'igl è d’esser omosexual en nossa societad e daco ch’el stat pli gugent a Turitg ch’en Grischun.

Marco Giger da Medel en la Surselva ha schon adina savì ch’el è omosexual:

Jau n'hai mai gì quest patratg: «Whoa quai è ina bella dunna». Jau guardava schon adina pli gugent sin ils umens.
Autur: Marco Giger

Ma fin ch’el ha gughegià da dir dad aut ses patratgs, esi ì in pèr onns. Cun 16 onns ha el fatg l'outen l’emprim tar collegas e sia mamma. Spert haja dentant l’entir vitg savì ch’il giuven è omosexual – e las reacziuns sajan stadas fitg differentas:

Da quels che han ditg: «Quai n'è nagin problem, ti ès anc adina mes collega, nus faschain vinavant sco adina» fin «Ti maltgiert schwul cun tai vi jau avair da far nagut. Va e mora!»
Autur: Marco Giger

Tar la famiglia dal giuven da 24 onns na tschantschian ins betg propi sur da quai ch’el è omosexual, ma els acceptian el, di Marco Giger.

Grischun vs. Turitg

Per il Sursilvan eri cler, ch’el va suenter l’emprendissadi sco cuschinier giu en la Bassa a star. Mitschar da las renfatschas, egliadas e l’odi na possian ins era a Turitg betg, di Marco Giger ch'abitescha uss dapi sis onns a Turitg e lavura da nov sco conductur. Era qua guardan las persunas sch’el giaja maun en maun cun ses ami atras la citad, ma las egliadas na sajan betg uschè extremas sco en il Grischun, di el:

Ti sas simplamain ir enturn pli liber en la Bassa. Ti sas purtar chautschas stretgas e nagin mira sin tai. Ti sas avair en in muster spezial u ina colur che croda si e quai n'interessescha nagin. Qua sai jau ir maun en maun cun mes ami atras citad. En il Grischun na gughegiass jau mai quai.
Autur: Marco Giger

Ma il giuven ha era fatg sgarschaivlas experientschas a Turitg. Il mender che saja capità ad el, saja stà ina saira suenter sortida en il Niederdörfli.

In um ha tschappà mai e ditg: Jau savess pitgar tai sche jau vuless, jau pitg blers omosexuals. Jau hai era in cuntè e savess mazzar tai. Ti pitschna «schwuchtel» na savessas uschè u uschia far nagut encunter quai.
Autur: Marco Giger

Per cletg saja lura la polizia gist stada sin il plaz e l’um saja scappà, avant che far insatge a Marco Giger. Gist pervia da quai na po il Sursilvan era mai sa sentir segir, cura ch’el è sin via, di el.

Pli grond giavisch

Perquai è il pli grond giavisch da Marco Giger che las persunas acceptian simplamain la communitad da LGBTQ+ e che l’odi envers quella communitad na vegn betg derasada ubain ins laschia simplamain cumbain in l’auter.

RTR actualitad 08:00

Artitgels legids il pli savens

Scrollar a sanestra Scrollar a dretga