Nus avain tranter auter pruvà da sclerir, pertge che tals projects cun ils uffants fan senn ed èn impurtants. Plinavant avain nus vulì savair co ch'els emprendan ensemen cun scolastAs ed experts da Pro Terra Engiadina dapli sur da la natira e da la biodiversitad.
L'idea è sa dada or d'in workshop davart la promoziun per in svilup persistent da la natira, cultura e cuntrada en l'Engiadina Bassa. Manà vegn il project da la fundaziun Pro Terra Engiadina che porscha maun a las scolas tar l'organisaziun: Saja quai cun metter a disposiziun guaffens, sclerir dumondas pervi dal terren u er sustegn tar la tgira da l'iert fin tar la racolta.
Finamira dal project è da promover gia da pitschen ensi la relaziun cun l'ambient, da sviluppar responsabladad per la natira sco era da mussar co ir enturn cun il tema durabilitad. Sper la scola da Ramosch as participeschan er anc quellas da Strada, Sent, Ftan, Ardez e Zernez al project.
Dals experts survegnan ils uffants tranter auter:
- tips per manar in diari d'iert
- enconuschientschas davart l'aura
- infurmaziuns tge plantas u verduras ch'èn indigenas
- savida davart plantas u plantinas pli veglias da la regiun
- tips per la tgira da l'iert
L'iert da scola duai lura er esser la basa per divers cuntegns da l'instrucziun, tranter auter en il rom «natira uman e societad». Saja quai lura cun emprender d'enconuscher e definir diversas spezias d'animals e plantas, sviluppar in plan per las lavurs d'iert, da la producziun da mangiativas u er dals ciclus da la natira durant las 4 stagiuns. Er geniturs u vischins interessads pon vegnir integrads en il project.
- Dapli dal project «Missiun B».
- Registrai Vossa surfatscha biodiversa sin missiunb.ch, il link avra en ina nova fanestraavrir en il browser.
- As participai a nossa gruppa sin Facebook, il link avra en ina nova fanestraavrir en il browser.
RR actualitad 11:00