Siglir tar il cuntegn

Header

video
«Tes vitg - Tia istorgia» - Rueun
Or da RTR Social dals 29.06.2020.
laschar ir
cuntegn

Tes vitg – Tia istorgia Nus giain a Rueun

Rueun è l'emprim vitg da l'acziun da stad da RTR Tiu vitg – Tia istorgia. Da mesemna enfin venderdi è il team per Vus cun la rulotta da RTR al lieu e rapporta da Vossas istorgias e Voss cuntegns.

Rueun è in vitg amez la Surselva. Il vitg è sin 788 meters sur mar ed ha ina surfatscha dad 11,58 kilometers quadrat. Dapi l'onn 2014 tutga il vitg da Rueun tar la vischnanca dad Ilanz/Glion. Il num «Rueun» duai derivar dal pled latin «rova», quai che munta tant sco bova. Il vitg da Rueun è numnadamain bajegià sin il cugn d'ina bova.

video
Ord l'archiv: In purtret dal vitg da Rueun
Or da Direct da … dals 13.09.1992.
laschar ir

La Punt da Rueun

In monument caracteristic per Rueun è la Punt da Rueun. Dapi il 1840 maina la punt da lain sur il Rain Anteriur. Ella collia la staziun da Rueun cun la via da Polacs. La Punt da Rueun è la pli veglia punt cuverta da lain en Grischun. Ella è sut la protecziun da monuments dal chantun.

Las bovas da l'onn 2002

Ils 16 da november 2002 è la bova da s. Antoni vegnida per la segunda giada. Bunamain 100 onns suenter l'emprima bova. Trais lavurers da maschina eran lura vegnids tschiffads da la bova. Tuts trais han pudì vegnir salvads. Bunamain 70 persunas ch'abitavan en la zona da privel eran vegnidas evacuadas.

Baselgia s. Andriu

La baselgia s. Andriu è vegnida menziunada per l'emprima giada l'onn 831 sco baselgia roiala privata. Pli tard tutgava ella a la claustra da Faveras e lura a la claustra da Mustér. Sper la baselgia ha Rueun era anc quatter chapluttas. Quai èn las chapluttas: s. Clau, s. Francestg, s. Antoni de Padua e s. Maria Madleina.

Uniuns a Rueun

Las uniuns èn fitg activas a Rueun. Tranter auter datti uniuns sportivas sco l'uniun da gimnastica u il club da ballape US Rueun che gioga en la 5avla liga. L'uniun da giuventetgna da Rueun ha organisà ils davos trais onns in Street food festival en il vitg.

Ma era la musica chatta ses plaz a Rueun. Il chor maschadà Rueun-Siat ha gia organisà quatter musicals. Sco davos il 2017 il musical «Adia Surselva – hello New York!». Ed era gia pli baud è vegnida organisada a Rueun ina u l'autra occurrenza culturala. Ma – guardai sezs:

video
Ord l'archiv: Openair Rueun
Or da Telesguard dals 01.09.1990.
laschar ir

Tes vitg – Tia istorgia

Tge istorgias ha Rueun anc da raquintar? Raquinta era Ti a nus da Rueun. Enconuschas Ti ina persuna u ina istorgia interessanta? Nus duvrain Voss agid. Tramettai Voss inputs sin social@rtr.ch u via WhatsApp al numer 079 200 70 07.

Grazia fitg per Vossas ideas!

RTR actualitad 15:00