Agid per l'Ucraina - Solidaritad munta er blera lavur

En il «Stockercenter» en la via da Masans a Cuira vegn ina gronda part da la rauba d'agid dal Grischun ensemen. Rauba ord differentas regiuns grischunas che duessan, la fin finala, chattar la via tar la populaziun da l'Ucraina.

Retus Sgier è in dals chaus sch'i va per l'agid per l'Ucraina en il Grischun. El è suprastant da l'uniun «Agid per l'Ucraina en il Grischun». El è ina da las persunas che coordineschan la lavur e che guardan che la rauba chatta la via tar la populaziun ucranaisa.

Relaziun persunala cun l'Ucraina

I ha er motivs persunals daco che la guerra en l'Ucraina va fitg datiers Retus Sgier. Il Sursilvan ch'abita a Landquart è maridà cun ina dunna ucranaisa e sia sira è anc adina en l'Ucraina. Suenter in emprim mument da schoc avant duas emnas cura che la guerra ha cumenzà, ha el ditg a sasez: «I sto marschar insatge». Dapi lura s'engascha Retus Sgier per la populaziun ucranaisa. Di per di coordinescha el l'entira acziun en il Grischun. El di dentant era ch'i na giess betg senza voluntaris. Mintga di gidan 20-50 persunas da zavrar e da far urden cun la rauba ch'arriva tar els. La solidaritad sa mussa pia da tuttas varts.

Agid per l'Ucraina

Acziun da solidaritad era en Surselva