A Cuira èsi da quintar cun fin a 13 grads, a Mustér 12 grads ed a Savognin e San Murezzan var 9 grads. Tenor Jürg Zogg da SRF Meteo èsi da spetgar cun temperaturas da primavaira.
Tenor Zogg èn las temperaturas schizunt datiers dals records dal di en singuls lieus, a Cuira possian ins quintar ch'il record da Silvester or dal 1961 cun 12,8 grads pudessi vegnir surpassà. Sur l'entir mais december u er schaner haja gia da pli chaudas temperaturas.
Il motiv è ina zona da pressiun auta
Raschun è ina zona da pressiun auta che vegn da l’Atlantic e la Caribica. Da Silvester e Bumaun vegn quai a dar autas temperaturas e sulegl, e nagina plievgia. Il cunfin da 0 grads vegn ad esser aut, enfin 3’300 meters sur mar. L’enviern turna lura vers mez da l’autra emna. Tenor SRF meteo pudess quai dar la mesemna blera naiv en ils culms dal nord dal Grischun.
Gia la gievgia temperaturas da record en Svizra
En Svizra èsi vegnì la gievgia temperaturas da record tar pliras staziuns. Dapi l'entschatta da las mesiraziuns n'èn las temperaturas bassas dal december anc mai stadas uschè autas sco ils 30 da december, rapporta MeteoSchweiz via Twitter.
En il chantun Turgovia per exempel n'è il termometer betg sa sbassà sut 11,2 grads. Quai è la pli auta valur dapi 28 onns. En ils chantuns Berna ed Argovia èsi schizunt vegnì mesirà in record da chalur cun 9,5 grads, respectiv 10,6 grads.
