A l'ur da la radunanza generala da la EMS-Chemie dad oz sonda han activistas ed activists dals Giuvens socialists svizzers Juso protestà encunter la dividenda ch'il concern paja ora a sias acziunarias ed a ses acziunaris. Quest onn èn quai 440 milliuns francs. La partida critigescha surtut che la dividenda vegn pajada ora suenter in onn da pandemia nua ch'il concern haja relaschà glieud ed introducì lavur curta.
Iniziativa da 99%
Las activistas ed ils activits èn stads al lieu per far attent sin lur iniziativa da 99% che vegn en votaziun ils 26 da settember. Cun quella iniziativa hajan ils privilegis per ils acziunaris bainbaud ina fin, hai num en la communicaziun da la Juso.
Oz sto in acziunari che ha dapli che 10% aczias d'ina interpresa, sin livel federal pajar taglia be sin 70% da sias dividendas e sin livel chantunal per part be 50%. Tenor la Juso sto quest privilegi da taglia svanir, ils acziunaris stoppian pajar taglia sin l'entira entrada.