Sonda passada èn acziunarias e politichers pelegrinads a Domat. Era la 58avla radunanza generala da la Ems Chemia è puspè stada in event particular.
Radunanza generala, perdunanza u happening politic?
Autras societads d’aczias na porschan nagina musica, nagin gentar – sulet tractandas. La Ems Chemia nizzegia sia radunanza generala sco tribuna. L’interpresa envida mintgamai osps da la politica naziunala, chantunala e communala a Domat. Plinavant cumparan mintg’onn era represchentants da las pli impurtantas organisaziuns d’industria da la Svizra.
Festa sco perdunanza
Tant a la prominenza sco als acziunaris ha la Ems Chemia la sonda puspè purschì in program variant cun musica e producziuns, questa giada cun l’Appenzeller Echo. Ils tamburs da Domat han dà a la radunanza generala ina tempra da perdunanza. A prà la tempra da perdunanza va era il gentar ch’i ha dà il davos cun rulada mesolcinesa sco spaisa principala.
Approvà tut las fatschentas
Las 1'655 acziunarias ed acziunaris ch'èn stads preschents han approvà tut las fatschentas. Tranter auter ina dividenda da 13 francs ed ina dividenda extraordinaria da 4 francs. Malgrà che l'onn da fatschenta è stà difficil serra la EMS quel cun in gudogn da fatschenta da bun 440 miliuns francs.
Protesta da la Juso
A l'ur da la radunanza generala han activistas ed activists dals Giuvens socialists svizzers protestà encunter la dividenda ch'il concern paja ora als acziunaris.
