Far urden. Quai è l'ultima incumbensa che Andrea Bianchi ha en il manaschi, ch'el era part per 50 onns. Avant pli ch’ina emna ha el cumenzà – ed i na prendia nagina fin. Ils pli differents documents, per part veglianders, hajan sa rimnà durant ils onns. Uschè prest sco ch’el haja sortì in pau, vegnia l'archiv da la citad da Cuira a dar in'egliada, tge che saja interessant per els.
Nagins problems da laschar liber
Cun 76 onns saja bun per el da pudair smetter. El haja pudì sa preparar sin quel mument, e n’haja nagins problems da surdar il manaschi, di Andrea Bianchi. E cunquai che ses dus successurs fan gia in temp part da «Bianchi sculptur da crap» n'èsi betg mauns esters en ils quals ch’el surdat il manaschi da famiglia.
Mes successurs èn gia daditg qua, ed els ma dattan ina tscherta segirtad, ch’els vegnian a manar vinavant il manaschi en il senn da las valurs da quellas quatter generaziuns.
Cura ch'el giaja tras Cuira na sappia el mintgatant bunamain betg nua ch'el duai guardar – en blers lieus saja numnadamain «Bianchi sculptur» stà da la partida. Quai saja in fitg bel sentiment.
Quai è il bel tar nus. Tar nossa lavur vesan ins a la fin il resultat.
Ussa sa legra el da pudair far vacanzas en sia chasa da vacanzas a Pazen en Val Schons, senza ch'el stoppia pensar vi da termins u la fatschenta e simplamain giudair. Er la chasa da vacanzas saja in project da famiglia, gia la quarta generaziun da la famiglia Bianchi giaja là en vacanzas.
In duo suonda
Surpiglià il manaschi ha in duo: Albin Büchler ha 62 onns ed è gia 40 onns part dal manaschi. Guido Keller ha 37 onns ed ha fatg avant dus decennis ses emprendissadi. El è oriund da Pignia en Val Schons. Lur emprima sfida saja, da s'orientar en il biro. Quai na fetschian els tuts dus betg propi gugent. Là survegnian els sustegn da la dunna da Guido Keller.
Tradiziun cun vent frestg
Vinavant vegnian els dus a stgaffir sculpturas u craps da fossa ed esser activs en il sectur da restauraziun da bajetgs. L'emprima finamira saja natiralmain dad avair avunda lavur per pudair viver. Quai na saja betg adina simpel per in manaschi dal sectur da nischa. La segunda pitga da la fatschenta èn restauraziuns da substanza architectonica veglia da crap natiral e crap da sablun.
Guido Keller sa legra fitg da puspè pudair esser pli creativ che sco impiegà. La part creativa saja numnadamain quella da sviluppar objects ensemen cun clientas e clients. Era saja planisada ina cumparsa in pau pli giuvna, frestga e moderna.
