Gia diesch onns lavura Sandro Hafner sco sculptur da crap independent. El ha ses lavuratori a Schnaus. La professiun dal sculptur saja gia veglia ed ozendi dettia uschè blers materials novs per experimentar. Per ina singula sculptura a moda classica fetschian ins l'emprim in model d'arschiglia u gip. Lura fetschia il sculptur ina copia dal model da crap. Il resultat saja lura ina singula sculptura ch'haja duvrà ina massa uras da lavur ed perquai sajan daquels objects er chars.
Per mai èsi fitg impurtant che jau poss lavurar sche jau sun en mes lavuratori, e na stoss betg respunder telefons u e-mails. Perquai datti in scumond da telefonins en mes lavuratori. Quai è in pau mes lieu da forza qua, perquai na vul jau nagina distracziun.
La seria da capricorns
«Giannino» sa numnan ils pitschens capricons che Sandro Hafner ha creà. L'emprim ha el gia fatg avant diesch onns. Ussa ha el fatg cun agid da silicon-cautschuc ina furma per pudair cular plirs capricorns. Uschia haja dà in'entira seria da «Gianninos» da differents materials. Cun quella tecnica sa sbassan las uras da lavur per in singul capricorn, e quai pussibilitescha da vender els cun in pretsch moderat. Ses pli nov project è uss in capricorn grond ch'el vul lura mademamain producir en seria.
Sper il sculptur ha el fatg ina scolaziun supplementara sco decoratur intern. El creescha er lavabos da crap natiral e concepescha e realisescha entirs bogns per sia clientella.
Mai fascinescha fin oz la cumbinaziun da creativitad cun l' aspect artisanal vi da mia professiun.
