Siglir tar il cuntegn

Header

video
Budget optimistic malgrà pandemia
Or da Telesguard dals 14.10.2021.
laschar ir
cuntegn

Budget 2022 Il chantun quinta cun in pli pitschen deficit ch'ils onns passads

Dapli expensas, dapli investiziuns, la pandemia da corona e tuttina: Il chantun Grischun quinta cun in deficit da 9,9 milliuns francs per l'onn che vegn. Quai èn bunamain 25 millliuns francs pli pauc che anc en il budget 2021.

  • Il chantun quinta cun in deficit da 9,9 milliuns francs per il 2022.
  • Las investiziuns per l'onn che vegn creschan per 3,8% sin 420,4 milliuns francs.
  • Per la perioda 2023-2025 quinta il chantun che la situaziun da corona sa normalisescha ed er che l'economia sa revegn puspè.

Il deficit ch'il chantun spetga per l'onn che vegn è marcantamain pli pitschen che tar il budget per l'onn 2021. Lura aveva il chantun quintà cun in deficit da 34,2 milliuns francs, uschia scriva il Departament da finanzas e vischnancas en ina communicaziun. Quel vegn probabel ad esser pli auts. Mo pass per pass.

audio
Budget meglier che quintà grazia a la SNB ed entradas da taglia
03:28 min, Actualitad dals 14.10.2021.
laschar ir. Durada: 03:28 minutas.

Dapli investiziuns

Il chantun quinta che las investiziuns per l'onn che vegn creschan sin var 420,4 milliuns francs. Quai è in plus da 3,8% u 15,5 milliuns francs. Las investiziuns nettas ch'il chantun porta sez muntan a 280,7 milliuns francs. Il chantun è cuntent ch'el possia er l'onn che vegn investir ina gronda summa da daners. Il budget da l'onn che vegn cumpiglia tranter auter investiziuns per differents projects da construcziun'auta:

  • La renovaziun dal center da dietas al Plantahof
  • Il center per l'emprima registraziun a Meiersboden
  • La nova basa per la polizia da traffic a Cuira

Malgrà tut èn las finanzas chantunalas equilibradas

Tenor il Departament da finanzas e vischnancas èn las finanzas chantunalas en in bun stadi. La raschun daco ch'il deficit budgetà è pli pitschen che l'onn precedent haja cunzunt da far cun il sustegn da la Banca naziunala Svizra ch'è creschì e cun dapli entradas da taglia.

Nus quintain er l'auter onn cun ina gronda summa da daners da la Banca naziunala svizra
Autur: Christian Rathgeb Cusseglier guvernativ

Plinavant sajan las consequenzas finanzialas entras la pandemia stadas pli pauc grondas che pensà. Per ils proxims onns fetschian ins quint che la pandemia da corona sa normaliseschia e cun quai er che la situaziun economia sa revegnia anc pli fitg. Tut en tut possian ins dentant bilantschar che la situaziun finanziala dal chantun saja detg stabila.

Il deficit dal 2021 è probabel pli grond che spetgà

In segn da dumonda resta per il minister da finanzas, Christian Rathgeb, però anc tar l'onn current, pia per il 2021. Tut tenor pudess il minus anc s'augmentar sin 48.3 milliuns francs sch'il Cussegl grond sustegn l'emna proxima l'uschenumnà «Green Deal» che prevesa investiziuns per la protecziun dal clima.

audio
Christian Rathgeb davart l'influenza dal «Green Deal» sin il quint da l'onn current
00:25 min, RTR Audio dals 14.10.2021.
laschar ir. Durada: 00:25 minutas.

Er las expensas extraordinarias pervi da la pandemia pudessan anc avair in'influenza. Il chantun quinta qua cun expensas da 90 milliuns francs pervia da la pandemia da corona e 67 milliuns francs sch'il «Green Deal» survegn sustegn dal Cussegl grond.

RTR novitads 09:00

Artitgels legids il pli savens

Scrollar a sanestra Scrollar a dretga