Dapli candidats che sezs per la regenza grischuna ed in record da candidaturas per il Cussegl grond. Las elecziuns dals 15 da matg empermettan tensiun. E tuttina han las grondas debattas ed emoziuns mancà.
Naginas grondas caneras, mabain grond respect
Uschia resumeschan ils maina-campagnas da l'Allianza dal Center, da la Partida verd-liberala e da la Partida verda il cumbat electoral dals ultims mais. Tar la PPS hai num sin dumonda dad RTR che la partida haja sapientivamain decis da betg attatgar persunas, mabain da restar tar ils fatgs. La Partida liberaldemocratica è da l'avis che - ditg in pau surfatg - mintga partida haja fatg ses agen cumbat e laschà da la vart las autras, e la Partida socialdemocratica beneventa che tematicas èn stadas en il center e betg scandals sco avant quatter onns cun ils embrugls enturn il cartel da construcziun.
Ins po dir che las partidas van pli u main d'accord ch'il cumbat electoral 2022 saja stà plitost insatge in cun u in dasper l'auter, ma betg ina confruntaziun. Dal center u er tar ils Verds hai gì num ch'i saja strategia da betg far canera, percunter empruvar da persvader cun cuntegns e persunas. La Partida populara ch'è cunzunt sin nivel naziunal magari enconuschenta per plazzar sias posiziuns cun dapli canera, haja en il Grischun in'autra strategia. Ins na saja anc mintgatant betg d'accord cun quai che tscherts exponents naziunals ditgian ed emprovia far quai en il Grischun auter.
Chattar candidatas e candidats per il Cussegl grond – la gronda sfida
Insatge che ha duvrà bler engaschi tar tuttas partidas è la midada dal sistem electoral tar il proporz e collià cun quella la tschertga da candidatas e candidats en tuttas regiuns dal chantun. Cunzunt las partidas grondas han resentì quai plitost sco sfida che sco schanza. Saja perquai ch'i n'è en tscherts circuls insumma betg gartegià da chattar glieud u ch'igl ha duvrà bler da persvader persunas da era simplamain candidar senza avair schanzas per uschia rimnar vuschs per la partida.
Las partidas pitschnas percunter han accentuà la schanza. Ins saja uschia en mintga cas daventà pli ferm en regiuns, nua ch'ins n'aveva fin uss nagina u strusch preschientscha, tuttina tge resultat ch'i dettias lura ils 15 da matg.
Co che quests budgets sa cumponan, è different da partida tar partida. Ina tscherta summa vegn mintgamai or da la cassa da la partida, vitiers vegnan donaziuns d'organisaziuns e persunas privatas.
La Partida socialdemocratica ha confermà ad RTR che ses candidat Peter Peyer paja fin 45'000 francs ord l'atgna bursa e ch'ella haja survegnì donaziuns pli grondas dals sindicats da fin 5'000 francs. Era la Partida liberaldemocratica ha survegnì ina donaziun gronda da ca. 5'000 francs – persunas privatas dettian savens summas pitschnas da circa 200 francs. Da summas tranter 30 e 3'000 francs discurra l'Allianza dal Center e la PPS accentuescha che ses budget saja pli u main il medem sco tar las ultimas elecziuns. Las duas partidas pitschnas – la Verda e la Verdliberala – finanzieschan lur cumbat electoral per il Cussegl grond surtut cun donaziuns pitschnas da persunas privatas.
Il Grischun elegia ils 15 da matg tschintg persunas per la regenza e 120 per il Cussegl grond.
Sin in clic tut davart las elecziuns grischunas.
