Ils placats dal cumbat electoral paran d'esser omnipreschents. Mo reclama per ils candidats e la candidata na vegn betg mo fatg sin via. En inserats ed artitgels en las gasettas, brevs da lecturs, flyers che vegnan cun la posta, sin canals en las medias socialas e cun la preschientscha a diversas occurrenzas vegn era fatg cumbat electoral. E quai percorschan las persunas dumandadas.
Per part vegn stgarpà davent placats, quai na para a mai betg gist . A mai na plascha er betg mintgin, ma jau pens che noss senn democratic è che mintgin po far ses agen parairi ed alura decider.
Per tgi bler, per tgi en urden
Per ils ins èsi memia blera propaganda, per tschels memia pauc, ed auters na s'interesseschan insumma betg per las elecziuns. I saja mintga giada il medem u perfin surfatg, din tschertas persunas dumandadas sin via. Autras chattan ils sforzs per las elecziuns fitg infurmativs, quai animeschia d'insumma sa fatschentar cun la tematica.
Jau sun led cura ch'ils 15 da matg è passà, ch'ins po finalmain puspè leger insatge auter en las gasettas.
E tgi candidescha?
La gronda part da las persunas dumandadas ha ditg, ch'ellas sappian tgi che candideschia per la regenza ils 15 da matg. Almain circa, e forsa betg gist tuts cun l'entir num e la partida. Clar è dentant: quels ch’èn gia en la regenza èn pli enconuschents tar las persunas dumandadas ch'ils candidats novs.