Siglir tar il cuntegn

Header

video
Visita en ustaria mo pli cun certificat.
Or da Telesguard dals 13.09.2021.
laschar ir
cuntegn

Certificat da Covid Tge effect ha l'obligatori da certificat sin ils giasts?

Dapi glindesdi vala in obligatori da certificat tranter auter per las ustarias. Quai ha era in effect sin ils giasts.

En il «Patschifig» a Cuira ha il certificat da Covid gì in effect negativ sin il dumber dals giasts. Era sche l'ustaria senza terrassa ha adina pli pauca clientella schi fa bell'aura – durant l'emprim di cun obligatori da certificat vegnia bain remartgablamain damain glieud, di la possessura dal local Sandra Christoffel. Persuenter dettia uschia nagin stress per far las controllas tar l'entrada. Ed in fitg grond avantatg saja en mintga cas che l'obligatori da mascrinas scrodia cun certificat era per els. Ella spera che la glieud sa disia era da quella mesira e turnia en ses local.

audio
Certificat da Covid: Co è la situaziun en ustarias grischunas?
03:45 min, Actualitad dals 13.09.2021.
laschar ir. Durada: 03:45 minutas.

En la «Pastizaria Cantieni» a Scuol na procuria l'obligatori durant l'emprim di anc betg per considerablamain damain giasts – persuenter per confusiuns. Cunquai ch'il manaschi è tant cafetaria, sco era butia na saja per il possessur Curdin Marugg betg anc dal tut cler tge reglas che valian nua. En quest cas saja – sco gia fitg savens ils davos mais – danovamain da sa fatschentar cun las reglas ed alura d'agir correspundentamain.

A Glion sentan ils ustiers l'obligatori dal certificat. Tant en il «Splerin» sco era en l'ustaria dal «Center Marcau» na sajan ils giasts betg vegnids sco usità. Prest la mesadad dals giasts han mancà oz, sco Silvan Maissen da l'ustaria en il «Center Marcau» ha detg. Per far la controlla dal certificat ha el stuì procurar per persunas supplementaras. Quitads als ustiers e las ustieras da Glion fa ch'ina gronda part da la clientella da tschep na sajan betg vegnids en las ustarias oz.

RTR Telesguard 17:40

Artitgels legids il pli savens

Scrollar a sanestra Scrollar a dretga