Sche la situaziun da corona sa pegiureschia na possian ins betg sclauder in’obligatori da certificat da covid per las pendicularas grischunas quest enviern. Quai ha detg il minister da sanadad Peter Peyer envers il schurnal regiunal dad SRF.
Il territori da skis Fideriser Heuberge ha gia annunzià d'introducir quest enviern in obligatori da certificat da covid. Tgi che vul ir quest enviern en il Partenz cun skis, a scursalar u a star sur notg dovra il certificat da covid.
Auters territoris da skis na vulan però betg suandar a l'exempel en il Partenz. Tenor Marcus Gschwend, il gestiunari da las Pendicularas grischunas na veglian ins nagin obligatori general.
Oz mesemna, decida il Cussegl federal probablamain sch’el vul implementar in obligatori da certificat per restaurants, museums u er per il traffic public. L'emna passada ha el lantschà la consultaziun per rinforzar las mesiras cunter la derasaziun dal coronavirus. Tenor quella duai il certificat vegnir pli impurtant en il mintgadi.
