Il Departament d'educaziun e cultura grischun ha elegì Alberto Palaia sco delegà per il Post spezialisà per la plurilinguitad. El cumenza ses uffizi l'entschatta mars 2022. Sco delegà dal Post spezialisà s'engascha Alberto Palaia per rinforzar la trilinguitad sco element caracteristic dal chantun. Ina da sias incumbensas principalas èsi, da cussegliar e sensibilisar ils departaments ed ils uffizis, sco er acturas ed acturs d'ordaifer l'administraziun, en connex cun realisar la legislaziun da linguas.
La lingua materna d'Alberto Palaia è talian, el discurra dentant rumantsch e tudestg sin nivel da lingua materna. El è magister da gimnasi diplomà e manader da scola. Palaia ha studegià istorgia a l'Universitad da Friburg cun ils roms laterals rumantsch e talian.
