Ils iniziants avevan pretendì per custs da giurists, e pervi da proceduras betg necessarias en connex cun l'iniziativa, radund 107'000 francs dal chantun. Ils iniziants enturn Christian Mathis eran da l'avis, ch'ins avessia pudì spargnar custs, sche la regenza grischuna avess infurmà correct.
Concret èsi ì als iniziants per il fatg ch'il cusseglier guvernativ, Mario Cavigelli haja tegnì enavos in parairi da l’uffizi federal d’ambient (BAFU), ch’è vegnì a la conclusiun che l’iniziativa saja valaivla. Sch’il Cussegl grond avess savì da quest parairi, avessia el cartaivlamain betg declerà l'iniziativa sco nunvalaivla l'onn 2015.
Gliez avess spargnà blers custs als iniziants. Els han numnadamain stuì cumbatter fin al Tribunal federal per la valaivladad da lur iniziativa. Il 2017 han els alura survegnì cumplainamain raschun dals derschaders a Losanna – en consequenza han els er survegnì ina indemnisaziun da la partida da 3'000 francs, sco er ulteriurs 3'000 francs per la procedura.
Tribunal federal refusa plant
La dretgira ha uss snegà ina responsabladad dal stadi e refusà il plant cunter il chantun Grischun. L'argumentaziun da la decisiun negativa dal Tribunal federal suonda pir pli tard.
Gia l'avust passà aveva la Dretgira administrativa dal chantun Grischun refusà il plant dals iniziants. Ella era vegnida a la conclusiun che l'indemnisaziun da partida ch'il Tribunal federal haja decis, saja finala. Plinavant na saja il donn finanzial betg vegnì argumentà suffizient dals iniziants.
Il suveran grischun ha refusà il matg 2019 l'iniziativa cunter la chatscha speziala.
